„მე და იურამ 9 წელიწადი ვიცოდით, რომ ზურას ცააძემ ესროლა საკონტროლო ტყვია. გოგატიშვილმა, რომელიც შემთხვევით შეესწრო სპეცოპერაციას, იგივე გაიმეორა, რაც შემთხვევის დღეს განაცხადა."- აცხადებს ზურაბ ვაზაგაშვილის დედა, ციალა შანავა „კვირის პალიტრასთან" კორტების საქმესთან დაკავშირებით საუბრისას.
შანავას განცხადებით, არსებობს მოწმე, რომელიც აცხადებს, რომ ჯერ კიდევ ცოცხალ ზურაბ ვაზაგაშვილს სპეცრაზმელმა ცააძემ საკონტროლო ტყვია ესროლა.
„ზურიკო 5 წუთის მოკლული იყო, როცა მან სატელევიზიო კომენტარში თქვა: მომაკვდავ ზურას წყალი უნდოდა და მის მოსატანად გავიქეცი, ზურას ერთი ხელი საჭეზე, მეორე კარზე ჰქონდა ჩამოკიდებული, ცააძემ მითხრა, აქედან გაეთრიეო. როცა გამოვედი, გასროლის ხმა მომესმა, ცააძემ პისტოლეტი შეყო მანქანაში და თავში ესროლაო.
გაოგნებული ვარ მკვლელების და მათი ახლობლების ქცევით, რომლებიც მუდმივად აწყობენ პროვოკაციებს. ცააძის მამიდა მემუქრება, დაგასახიჩრებ, ხომ გილპება მიწაში სამი კაციო... ცააძე გოგატიშვილსაც დაემუქრა, არ გეშინია, ჩემი ძმაკაცები ხომ გარეთ არიანო... პროცესზე ირაკლი ფირცხალავა ისე გამოდის სიტყვით, თამადა გეგონება. მერე ეს ცააძე ხტუნაობს... ცააძე ერთმა ქალბატონმაც ამოიცნო. ის ზურას მანქანის უკან იდგა და პირდაპირ უყურებდა. ამბობს, მანქანებიდან გადმოხტნენ სპეცრაზმელები და ბიჭების მისამართით ისეთი სროლა ატყდა, ხელ-ფეხი ამიკანკალდა, მანქანა ვეღარ დავძარიო. ცააძე მისულა მასთან, წაეთრიე, ვერ ხედავ, რა ხდებაო? ალბათ, უნდოდათ, არავის დაენახა, როგორ ჩააწყობდნენ იარაღს მანქანაში."- აცხადებს ციალა შანავა.
