ექსპერტი უსაფრთხოების საკითხებში ვახტანგ მაისაია „ალიას" იმ საფრთხეების შესახებ  ესაუბრა, რომლებზეც ახლად შექმნილმა სახელმწიფო უსაფრთხოების სამსახურმა უნდა გაამახვილოს ყურადღება. მაისაიას თქმით, ვახტანგ გომელაურმა სუს-დან „ნაცმოძრაობის" დროინდელი კადრები უნდა მოიშოროს და ახლები მიიყვანოს, რომლებიც ყველაფერს გააკეთებენ ქვეყნის უსაფრთხოებისთვის.

„პირველ რიგში, საფრთხეები ჯერ თავად სამსახურის შიგნით უნდა გაანეიტრალოს ვახტანგ გომელაურმა.  ესენი არიან ძველი, „ნაცმოძრაობის" დროინდელი არაპროფესიონალი კადრები.  ეს ადამიანები ქვეყნის უსაფრთხოებას კი არ იცავდნენ, ერთი პოლიტიკური პარტიის დაკვეთებს ასრულებდნენ, პირადი მიზნებისთვის იყენებდნენ უშიშროების სტრუქტურების რესურსებს და ამით საფრთხეს უქმნიდნენ ქვეყანას. აი, ამ ძველ სამსახურებში ჩაბუდებული ხალხის განდევნა უნდა მოხდეს, ამ ხალხის ლუსტრირება და მოშორებაა საჭირო. გომელაური თუ ამ საქმეს ჩაეძიება და მართლა მოინდომებს ამ ნაგვის გატანას სუს-იდან, აღმოაჩენს, რომ ბევრი სისხლის სამართლის დამნაშავე მუშაობს იქ, რომლებიც ადამიანების წამებაშიც მონაწილეობდნენ. წარსულს თავი დავანებოთ და  ეს ხალხი დღესაც ძალიან დიდ საფრთხეს წარმოადგენს. მათ ხელი მიუწვდებათ უმნიშვნელოვანეს ინფორმაციებზე, რომლებიც შეიძლება უცხო ქვეყნის სპეცსამსახურებს მიჰყიდონ ან პირადი მიზნებისთვის გამოიყენონ, თუნდაც შანტაჟისთვის და აქედანაც მატერიალური სარგებელი ნახონ. მოკლედ, ეს ხალხი უნდა მოიშოროს გომელაურმა და ახალი კადრები მიიყვანოს სუს-ში, ის ხალხი, რომელიც მართლა ყველაფერს გააკეთებს ქვეყნის უსაფრთხოებისთვის", - აცხადებს ვახტანგ მაისაია.

შეგახსენებთ, შსს ორად გაიყო და მოხდა საპოლიციო და სახელმწიფო უსაფრთხოების ფუნქციების ერთმანეთისგან გამიჯვნა. 1 აგვისტოდან ამუშავდება სახელმწიფო უსაფრთხოების სამსახური, რომელიც მთავრობის დაქვემდებარებაში არსებული სპეციალური დანიშნულების დაწესებულება იქნება. ახალი სპეცსამსახურის უფროსად პრემიერ-მინისტრმა შს მინისტრი ვახტანგ გომელაურის კანდიდატურა წარადგინა. იგი სუს-ის უფროსად პარლამენტმა უნდა დაამტკიცოს.

წყარო: „ალია"

(მოამზადა თაკო საკანდელიამ)