„სახალხო კრების" წევრი ირაკლი ბათიაშვილი „რეპორტიორს" თავდაცვის ყოფილი მინისტრის დავით კეზერაშვილის მიმართ წითელი ცირკულარით ძებნის გაუქმებასთან დაკავშირებით ესაუბრა. მისი თქმით, საერთაშორისო ორგანიზაციები საქართველოს ხელისუფლების მიმართ აშკარა უპატივცემულობას გამოხატავენ. ირაკლი ბათიაშვილი მიიჩნევს, რომ კეზერაშვილის ძებნილთა სიიდან ამოღება მოსალოდნელი იყო.
„ის, რომ დავით კეზერაშვილს, რომელიც ეჭვმიტანილია მთელ რიგ დანაშაულებში, წითელი ცირკულარით ძებნა მოუხსნეს, არ არის მხოლოდ საქართველოს პროკურატურის ბრალი.
ჩვენს ხელისუფლებას, სამწუხაროდ, საგარეო ასპარეზზე ურთიერთობები მოგვარებული არ აქვს. ჩვენი ხელისუფლების ავტორიტეტი იმდენად დაბალია, რომ პრაქტიკულად ყველა აბსოლუტურ იგნორირებას უკეთებს მის მოთხოვნებს. დავიწყოთ იქიდან, რომ მიხეილ სააკაშვილი არათუ გადმოსცეს ქვეყანას, როგორც სისხლის სამართლის დამნაშავე, რომელზეც ასევე სისხლის სამართლის ძებნაა გამოცხადებული, არამედ გუბერნატორად დანიშნეს. იგივე ხდება კეზერაშვილთან დაკავშირებითაც. ეს არის სრულიად უპატივცემულო, აგდებული დამოკიდებულება დღევანდელი ხელისუფლების მიმართ. ეს კიდევ ერთხელ მეტყველებს იმაზე, რომ ჩვენი ხელისუფლების მუშაობა საგარეო ასპარეზზე წარუმატებელია. ჩვენს ხელისუფლებას არ აქვს ავტორიტეტი არც ევროპაში, არც ამერიკის შეერთებულ შტატებში.
აშკარა იყო, რომ კეზერაშვილს ექსტრადირებას არ უპირებდნენ. ეს კი უკვე ნიშნავს, რომ ადრე თუ გვიან მის გვარს ამოიღებდნენ წითელი ცირკულარით ძებნილთა სიიდან",-აცხადებს ირაკლი ბათიაშვილი.
