გაეროს გენერალურ ანსამბლეაზე გამგზავრება პრემიერსა და პრეზიდენტს შორის კვლავ დაპირისპირების საგნად იქცა. ვინ უნდა წავიდეს, პრემიერი თუ პრეზიდენტი? აღნიშნულ საკითხთხზე „ახალ თაობას" ექსპერტი რამაზ საყვარელიძე ესაუბრა.
მისი განცხადებით, სამუშაო დიალოგის დამკვიდრება ერთ-ერთი მნიშვნელოვანი პრობლემაა.
საყვარელიძე ერთ ფრაგმენტს იხსენებს უახლესი ისტორიიდან, როცა ვარდების რევოლუციის წინ, საარჩევნო კომისიის თავმჯდომარე იყო ნანა დევდარიანი.
„ალბათ ადვილი მისახვედრია, რამდენად ცდილობდნენ დევდარიანზე ზეწოლას როგორც ხელისუფლება, ისე ოპოზიციურად განწყობილი მხარე. ყველაფერი რომ ჩათავდა და რევოლუციამ გაიმარჯვა, საყვედურიც კი ვერ უთხრეს დევდარიანს, იმდენად მკაფიოდ დამოუკიდებელი ხაზი ჰქონდა მას გატარებული ამ კომისიის მუშაობაში. დაპირისპირებებით არ გაუკეთებია ეს დევდარიანს! იმის თქმა მინდა, რომ დამოუკიდებლობა შეიძლება იქონიო ისე, რომ ეს არ გახდეს გლადიატორების ბრძოლის ველი. პასუხისმგებელი დღევანდელ ვითარებაში ორივე მხარეა, იმიტომ, რომ დიალოგი ორივე მხარის ვალდებულებაა. ასევე იმის ხელშეწყობა, რომ დიალოგის პირობები არსებობდეს." - აცხადებს საყვარელიძე.
