ფეხბურთის ფედერაციის აღმასკომის სხდომაზე კახეთის ფეხბურთის ფედერაციის მოთხოვნა დააკმაყოფილეს და კახეთის დელეგატს გოჩა ჭვრიტიძეს დელეგატის სტატუსი მოუხსნეს. კახეთის გარდა ფეხბურთის ფედერაციაში ხმის უფლების მქონე დელეგატები სამხრეთ ოსეთმა, აჭარამ, ამბროლაურმა და რუსთავმა შეცვალეს.
აღმასკომის სხდომის წევრმა სამეგრელო-ზემო სვანეთის ფეხბურთის ფედერაციის პრეზიდენტმა სერგო კვარაცხელიამ განაცხადა, რომ დღეს მიღებული ყველა გადაწყვეტილება კანონის ფარგლებში ჯდება და დელეგატების შეცვლის უფლება დღეს, 18 საათამდე კვლავ რჩება.
"აღმასკომის გადაწყვეტილებით, 6 საათამდე ფეხბურთის ფედერაციების წარმომადგენლებს ჰქონდათ უფლება შეეცვალათ დელეგატები და წარმოედგინათ სხვა კანდიდატები. დაკმაყოფილდა 5 დელეგატის შეცვლის მოთხოვნა. კონკრეტულად, მიზეზი, თუ რატომ მოხდა შეცვლა, კონკრეტულად დასახელებული არ ყოფილა. ზოგი ამბობს, რომ არსებობს გარკვეული ზეწოლა, ზოგი კი ზეწოლას გამორიცხავს", - განაცხადა სერგო კვარაცხელიამ.
როგორც ფეხბურთის ფედერაციაში გამართული აღმასკომის სხდომის დასრულების შემდეგ კახეთის ფეხბურთის ფედერაციის უკვე ყოფილმა დელეგატმა, გოჩა ჭვრიტიძემ ჟურნალისტებს განუცხადა, მან დელეგატის სტატუსის მოხსნის შესახებ შაბათს გაიგო და გადადგომის შესახებ ინფორმაცია მოულოდნელი აღმოჩნდა.
გოჩა ჭვრიტიძის ადგილს თენგიზ სულაქველიძე დაიკავებს.
