საქართველოს მორაგბეთა ეროვნული ნაკრები მსოფლიო თასზე დღეს, 2 ოქტომბერს მორიგ, მესამე შეხვედრას გამართავს.

„ბორჯღალოსნები" უელსში, კარდიფის „მილენიუმზე", თბილისის დროით 23:00 საათზე, მსოფლიოს მოქმედ ჩემპიონს, რეიტინგის პირველადგილოსან ახალ ზელანდიას, ისტორიაში პირველად დაუპირისპირდებიან. 

შეხვედრის პირდაპირ ტრანსლაციას „საზოგადოებრივი მაუწყებელი" უზრუნველყოფს.

მილტონ ჰეიგის გუნდი ჯგუფში ოთხი ქულით მეოთხე ადგილს იკავებს. ახალი ზელანდია 9 ქულით ჯგუფის ლიდერია. ახალზელანდიელებმა პირველ ტურში - არგენტინა, მეორეში კი ნამიბია დაამარცხეს.