ჟურნალისტი მაგდა კლდიაშვილი სოციალურ ქსელში განცხადებას ავრცელებს, რომელსაც უცვლელად გთავაზობთ:

„მთელი საარჩევნო პერიოდი ბინძური იყო, მანამდე ჭაობი იყო, მაგრამ სიჭინავას წასვლის შემდეგ, სფფ-ს ფარდა აეხადა უარესად, რომ იქ არიან შეკრებილები და დარჩენილები, 90% მხოლოდ სკამზე მონადირე უღირსი და არაპროფესიონალი ადამიანები, პროფესიონალებს და ერთგულებს ჩემი პატივისცემა კიდევ ერთხელ მათ. არასდროს ვყოფილვარ ვინმეს ზურგს უკან ამოფარებული, ვამბობ, ვფიქრობ და ვაკეთებ ერთსა და იმავეს, პირდაპირ, რევერანსების გარეშე. ასეა მთელი ჩემი სპორტული ცხოვრების განმავლობაში, შეიძლება ვიღაცისთვის ხისტი ვიყო, ვიღაცას ნერვებს ვუშლიდე, ვიღაცისთვის მოსაწონი არ ვიყოთ მე და ჩემი სტატუსები და ჩემი დაწერილი მასალები, მაგრამ, ნურავინ მოითხოვთ ობიექტურობას ამ სიტუაციაში. მე მაწუხებს, მადარდებს ქართული ფეხბურთის ბედი და ვერ ვიქნები ნეიტრალური, მე ვარ მხარე, მხარე, რომელიც ქართული ფეხბურთის მომავალს უჭერს მხარს და ეს მომავალი მე ვერ დავინახე 10 წლის განმავლობაში. მე ვუჭერ მხარს მომავალს, ახალ სისხლს, იმედს და თუ ვინმეს რამე გეწყინათ ამ პერიოდში, შეგიძლიათ, ცივი წყალი დალიოთ.

მე ცვლილებების მომხრე ვარ და ეს ცვლილებები ლევან კობიაშვილის სახელს უკავშირდება. ძალიან დიდ პატივს ვცემ მამუკას, მას ძალიან დიდი ცოდნა აქვს და ძალიან უყვარს ქართული ფეხბურთი და ეს ცოდნა აუცილებლად ყველას გამოადგება.

მთელი ამ პერიოდის შემდეგ, საქართველოს ფეხბურთის ფედერაციამ მომწერა, რომ ჩემი ფეისბუქ-სტატუსები აღიზიანებთ და აკრედიტაციას ვერ მომცემენ, ჩემს გარდა, სხვა ყველა მედიასაშუალების წარმომადგენელს მისცეს არჩევნებზე დასწრების უფლება.

მე ამ პროცესს გარედან მივადევნებ თვალს და იმედი მაქვს, რომ დელეგატების დიდი ნაწილი იფიქრებს არა საკუთარ კეთილდღეობაზე, რასაც არველაძის მომხრეებიდან ვხედავთ, არამედ ქართულ ფეხბურთზე, მის ბედსა და მომავალზე.

ცვლილებების დღეა! მე ამის მჯერა!" - წერს კლდიაშვილი.