საპარლამენტო უმრავლესობის წევრი ირაკლი სესიაშვილი ქვეყანაში მიმდინარე მწვავე პოლიტიკურ და სოციალურ საკითხებზე „რეპორტიორთან" საუბრობს:
- კიდევ ერთხელ მინდა გამოვეხმაურო გორის სამხედრო ბაზაზე ჯარისკაცის გარდაცვალების ფაქტს და ჩემი მწუხარება გამოვთქვა. ყოველთვის ვამბობ, რომ მშვიდობიანობის დროს ჯარისკაცის დაღუპვა არის ძალიან დიდი ტრაგედია ქვეყნისთვის. რა თქმა უნდა, გამოძიება უნდა ჩატარდეს. მე იმ დღესვე დავუკავშირდი თავდაცვის სამინისტროს ხელმძღვანელობას. გავეცანი ვითარებას, თუ რა მდგომარეობაში გარდაიცვალა ჯარისკაცი და როგორ მიმდინარეობს გამოძიება. კიდევ ერთხელ ვუსამძიმრებ როგორც ოჯახის წევრებს, ისე მთლიანად შეიარაღებულ ძალებს.
სამწუხაროდ, მიწევს ამაზე საუბარი, რომ გუშინ, „რუსთავი 2"-ზე გასული სიუჟეტი აბსოლუტურად ამოვარდნილი იყო ყველა სტანდარტიდან. ქალბატონმა თინა ხიდაშელმა თავის ოფიციალურ გვერდზე განცხადება გააკეთა და მე აბსოლუტურად ვიზიარებ მის განცხადებას. კიდევ ერთხელ ვთხოვ ყველას, ჟურნალისტებს, როდესაც საქმე შეეხება ადამიანის სიკვდილსა და სიცოცხლეს, უფრო მეტი სიფრთხილით მოვეკიდოთ ამ საკითხს. ამ სიუჟეტში ჟურნალისტმა რამდენიმე არაზუსტი ინფორმაცია გაავრცელა, მათ შორის ჩემთან მიმართებაში, როდესაც ის საუბრობდა, რომ თურმე მე დაუყოვნებლივ ვითხოვდი გამოძიებას. ვერ მოვითხოვდი გამოძიებას, რადგან გამოძიება იმწამსვე დაიწყო, როგორც კი ფაქტი დაფიქსირდა. ვერ შეისწავლის კომიტეტი საკითხს, რადგან ეს მისი კომპეტენცია არ არის. მე უბრალოდ გამოვთქვი სურვილი, რომ თუ გარდაცვლილის ოჯახის წევრებს სურთ, მეტი ინფორმაცია მიიღონ, ამაზე თავდაცვის სამინისტრომ უნდა იზრუნოს. დარწმუნებული ვარ, რომ ეს ასეც იქნება.
ეს არ არის მხოლოდ ამ ოჯახის ტრაგედია, ეს არის მთელი შეიარაღებული ძალების ტრაგედია. ისევე განიცდიან ჯარისკაცები, ოფიცრები, თავდაცვის სამინისტროს ხელმძღვანელობა, როგორც ოჯახი. ამ სიუჟეტის ავტორთან აუცილებლად მექნება ადამიანური საუბარი. მიუხედავად იმისა, რომ შემიძლია მოვითხოვო პასუხი, რათა ასეთი სიუჟეტების გავრცელებისას ეთიკის ნორმები დავიცვათ, მე მხოლოდ გავესაუბრები მას. კიდევ ერთხელ ვთხოვ ჟურნალისტებს, ასეთი ფაქტების გაშუქებისას იყავით მეტად ფრთხილნი.
- „ნაციონალური მოძრაობა" ხელისუფლების გადადგომასა და ვადამდელ საპარლამენტო არჩევნებს ითხოვს და ამ მიმართულებით ყველა პოლიტიკურ ძალასთან კონსულტაციებს იწყებს. ასევე აანონსებენ ქუჩის აქციებსაც. თქვენი, როგორც უმრავლესობის წარმომადგენლის პოზიცია როგორია აღნიშნულ საკითხზე?
- „ნაციონალურმა მოძრაობამ" ძალიან ბევრჯერ გაბერა პოლიტიკური ბუშტი, რომელიც ძალიან მალე გაუსკდათ. 2012 წლის არჩევნების დასრულების შემდეგ ინტენსიურად ვრცელდებოდა ჭორები, რომ გაზაფხულზე თუ შემოდგომაზე მიშა უნდა დაბრუნებულიყო. ეს ყველაფერი, ეს ჭორები ემსახურებოდა ერთადერთს - „ნაციონალურ მოძრაობას" როგორმე შეენარჩუნებინა საკუთარი მხარდამჭერები. ძალიან კარგად ესმით „ნაციონალური მოძრაობის" წევრებს, რომ ვადამდელ საპარლამენტო არჩევნებს სჭირდება შესაბამისი კონსტიტუციური საფუძვლები, რაც ახლა არ არსებობს. ასევე მათ ძალიან კარგად იციან, რომ ვადამდელი თუ ვადიანი არჩევნების შემთხვევაში მათ არანაირი შანსი არ აქვთ. უბრალოდ, აქ არის ძალიან მარტივი პროვოკაციული ფონი, რომელსაც ისინი გეგმავენ და იყენებენ. სწორედ ესაა „ნაციონალური მოძრაობის" სამიზნე, რომ საზოგადოების გარკვეული ნაწილი ამ პროვოკაციას წამოეგოს და ეს ყველაფერი მათ წარმატებად ან ძლიერებად აღიქვას. რეალურად, საქმე გვაქვს ძალიან მარტივ პროვოკაციებთან და პოლიტიკურ სპეკულაციებთან. ეს არის მორიგი ბუშტი, რომელიც გუშინ გაიბერა და დღეს გასკდება.
- „ნაციონალური მოძრაობის" წევრები აცხადებენ, რომ კონსულტაციები გაიმართება ყველა პოლიტიკურ ძალასთან. როგორ ფიქრობთ, ვინ შეიძლება გაერთიანდეს ამ მიმართულებით „ნაციონალებთან"?
- ვადამდელ საპარლამენტო არჩევნებს ითხოვდა ქალბატონი ნინო ბურჯანაძეც. „ნაციონალები" ამბობენ, რომ ყველასთან ითანამშრომლებენ. შესაძლოა, მათი ალიანსიც კი ვიხილოთ. ჰკითხეთ მათ. თუ ვინმე ამ ნაბიჯს გადადგამს, ეს მათი არჩევანია. ჩვენი საზოგადოება კი თავის არჩევანს გააკეთებს.
- თავად თუ ხედავთ ვადამდელი არჩევნების საჭიროებას?
- კიდევ ერთხელ ვიმეორებ, ვადამდელ საპარლამენტო არჩევნებს სჭირდება კონსტიტუციური საფუძველი. ასეთი საფუძველი ახლა არ არსებობს.
ვთქვათ და ვიფიქროთ ვადამდელ საპარლამენტო არჩევნებზე. სხვადასხვა ეთერებში სულ ვამბობ, რომ „ნაციონალური მოძრაობა" პირველ ადგილზე ყოველთვის აყენებდა და აყენებს თავის ვიწრო პოლიტიკურ და პირად ინტერესებს. სადღაც, უკანა რიგებში, არის ხოლმე სახელმწიფო ინტერესები. ყველას ძალიან კარგად ესმის, რომ ქვეყნისთვის, მისი იმიჯისთვის ძალიან მნიშვნელოვანია, რომ არჩევნები ჩატარდეს თავის ვადებში. ეს არის სტაბილურობის გამომხატველი, რაც გავლენას ახდენს ეკონომიკაზე, ინვესტორებზე, ზოგადად ქვეყნის განვითარებასა და იმიჯზე. ეს ნებისმიერ პოლიტიკოსსა თუ ექსპერტს ძალიან კარგად ესმის.
თუმცა, „ნაციონალების" სურვილები და ეს განცხადება თავისთავად უკვე პროვოკაციულია და მიმართულია ქვეყნის ინტერესების საწინააღმდეგოდ.
- როგორ შეაფასებთ 2 ოქტომბერს პარლამენტის წინ მომხდარ ინციდენტს?
- მე ამ ინციდენტს დავარქვი „ნაციონალური მოძრაობის" მონატრება ძალადობისკენ. მონატრება, რომ პოლიტიკური საკითხები მუშტი-კრივით გავარჩიოთ. დარწმუნებული ვარ, მიუხედავად მათი „დემოკრატიული რიტორიკისა", ხელისუფლებაში დაბრუნების შემთხვევაში, მმართველობის ყველა იმ ძალადობრივ სტილს, რაც ადრე ჰქონდათ, სიამოვნებით გაიხსენებენ.
- „ნაციონალური მოძრაობის" მხრიდან დაანონსებულ ქუჩის აქციებზე რა აზრის ხართ?
- ჩემი აზრით, ეს არის მორიგი პოლიტიკური ბუშტი, რომელიც გუშინ გაბერეს და ალბათ დღეს უკვე გაუსკდებათ.
- მედიაში არსებულ ვითარებაზე რას იტყვით?
- დღეს პოლიტიკაში ერთგვარ სტანდარტად დამკვიდრდა, ვილაპარაკოთ და ვაფიქსიროთ პოზიცია, რომელიც ჩვენ გვაწყობს. „რუსთავი 2" საუბრობს იმას, რაც აწყობს, რადგან მის უკან პოლიტიკური ინტერესები დგას. საუბრობს იმ ფორმით და იმ სახით, რაც მას აწყობს და სჭირდება პოლიტიკურად. აქ ჩვენ მედიის თავისუფლებასთან არანაირი კავშირი არ გვაქვს. აქ საქმე გვაქვს ბიზნესინტერესებთან. ერთი ადამიანი ითხოვს თავის წილს, სახელმწიფო აქ არაფერ შუაშია. მგონი, მე „რუსთავი 2"-ის სიტყვის თავისუფლებას არანაირად არ ვზღუდავ. ხშირ შემთხვევაში, პირიქით ხდება, ისინი უფრო არღვევენ ჩემს, როგორც მოქალაქისა და პოლიტიკოსის ინტერესებს. ტყუილის თავისუფლება და მედიის თავისუფლება უნდა განვასხვავოთ ერთმანეთისგან. მე ამას გავუძლებ, რადგან პოლიტიკოსი ვარ და თმენის ვალდებულება მაქვს. მაგრამ, მირჩევნია, რომ უფრო მეტი პროფესიონალიზმი და ეთიკურობა იყოს. ადრე თუ გვიან ამას ყველა მოვიმკით. მოვიმკით იმ ნაწილში, რომ ჩვენი საზოგადოება დაზარალდება.
საერთო ჯამში, ჩვენ და „რუსთავი 2"-ს რომ განსხვავებული შეხედულებები გვაქვს, იმის ბრალია, რომ მათ სურთ, დააფიქსირონ პოზიცია, რომელიც მათ აწყობთ. გადახედეთ პოლიტიკურ ოპოზიციურ სპექტრს. ყველა ცდილობს, დააფიქსიროს მხოლოდ ორი პოზიცია, რომ მოწინააღმდეგე არის მტყუანი და მისი პოზიცია არის მართალი. დღეს მოდაშია, რომ ხელისუფლება უნდა აკრიტიკო, მიუხედავად იმისა, ობიექტური საფუძველი გაქვს თუ არა.
- საარჩევნო სისტემაზეც გკითხავთ. თქვენი ოპონენტები მუდმივად გაკრიტიკებენ აღნიშნულის გამო. ხედავთ თუ არა ხარვეზებს და რა გეგმები გაქვთ ამ მიმართულებით?
- ის, რასაც ჩვენ ვთავაზობთ საზოგადოებას, ქვეყანას, ეს არავის გაუბედია აქამდე. ვერავინ გაბედა, ეთქვა რომ მაჟორიტარული სისტემა უნდა გავაუქმოთო. ჩვენ ვსაუბრობთ, რომ ვიყოთ პრაგმატულები, რომ ხავერდოვნად გადავიდეთ ერთი სისტემიდან მეორეზე, რომ მოვახერხოთ და შევიტანოთ ცვლილებები კონსტიტუციაში, ამისათვის უნდა ვთქვათ, რომ ამ არჩევნებს ჩავატარებთ არსებული სისტემით, ოღონდ იმ ცვლილებით, რასაც ჩვენ მთელი საერთაშორისო საზოგადოება წლების მანძილზე გვთხოვდა. ჩვენ მთლიანად გავაუქმებთ მაჟორიტარულ სისტემას. სხვამ ვერავინ გადადგა ეს ნაბიჯი.
- ევროსაბჭოს რეზოლუციაზეც გკითხავთ. რა დამოკიდებულება გაქვთ აღნიშნულის მიმართ?
- ჩემთვის ევროსაბჭოს გადაწყვეტილება არის აბსოლუტურად პოლიტიზირებული. იქ, სადაც თემა არის პოლიტიზირებული და აცდენილია რეალობას, მე, სამწუხაროდ, ამ რეზოლუციას ვერ მივიღებ იმ მეგობრების კეთილ რჩევად, რომელსაც ჩვენ ყურადღებით მივყვებით ხოლმე. ავიღოთ თუნდაც ეუთო-ს დასკვნა, სხვა საერთაშორისო ორგანიზაციების რეკომენდაციები, რომლებსაც ვცდილობთ, რომ გავიზიაროთ.
ის, რა წარმატებასაც მიაღწია ქვეყანამ წინასწარ პატიმრობასთან მიმართებაში, ამის არდანახვა და მიზანმიმართულად ამის არაფიშირება, ესეც პოლიტიზებულია. 2012 წლის არჩევნების შემდეგ ძალიან სერიოზულად გაიზარდა იმ საქმეების რაოდენობა, სადაც სასამართლოები წინასწარ პატიმრობას არ იყენებენ.
ევროსაბჭოს მხრიდან ჩვენ მივიღეთ აბსოლუტურად პოლიტიზებული, ერთ პოლიტიკურ ინტერსებზე დამყარებული განცხადება.
