for.ge-სთან საუბარში პარლამენტის თავმჯდომარის მოადგილე მანანა კობახიძე „რუსთავი 2"-ის ირგვლივ განვითარებულ მოვლენებს ეხმაურება და აცხადებს, რომ „რუსთავი 2"-ის და „ნაციონალური მოძრაობის" ისტერიკა მიმართულია იმისკენ, რომ შექმნან არასტაბილურობის ფონი, რომელიც გამოადგებათ დესტაბილიზაციისთვის.

„ნურავინ მოიტყუებს თავს და ნუ იტყვის, რომ „რუსთავი 2" არის თავისუფალი მედია. თავისუფალი მედია ნიშნავს, რომ არც ერთი პოლიტიკური ძალის გავლენის ქვეშ არ უნდა იყოს. „რუსთავი 2" ნამდვილად არ არის თავისუფალი „ნაციონალური მოძრაობის" გავლენისგან. შესაბამისად, მოგონილია თემა, რომ თურმე თავისუფალი მედიის წინააღმდეგ მიდის ბრძოლა. დღეს, ხელისუფლება არც ერთ მედიას არ აკონტროლებს და ამის სურვილიც არ აქვს. ამის მაგალითია „მე-9 არხი", რომელიც ბიძინა ივანიშვილმა დახურა სწორედ იმიტომ, რომ ხელისუფლების ხელში არ ყოფილიყო რომელიმე მედიასაშუალება. საქართველოში ყველამ იცის, რომ „რუსთავი 2" არის პარტიული ტელევიზია და არაფერი კავშირი სიტყვის თავისუფლებასთან არ აქვს", - აცხადებს მანანა კობახიძე და გამოცემასთან საუბრისას „რუსთავი 2"-სა და ქიბარ ხალვაშს შორის მიმდინარე დავასაც აფასებს.

„მნიშვნელოვანია ის, რომ ხელისუფლება არანაირად არ ერევა ამ დავაში. ჩვენ პოზიციაც არ შეიძლება გვქონდეს ამ დავასთან დაკავშირებით. დავა მიმდინარეობს კერძო პირებს შორის. ყოფილი მესაკუთრე ედავება ახალ მესაკუთრეს. ვინ მართალია და ვინ მტყუანი, ეს უნდა გაარკვიოს სასამართლომ. თურმე, რატომ მიმართა ყოფილმა მესაკუთრემ სასამართლოს და ამის გამო ადანაშაულო ხელისუფლება, ეს არის ძალიან დიდი უსინდისობა იმ ხალხისგან, ვისაც წარულშიც აქვს „იმედის" დარბევის საქმე. უკაცრავად და რა გამოდის, ქიბარ ხალვაშს სასამართლოსთვის მიმართვის უფლება ავუკრძალოთ? თურმე „ნაციონალურ მოძრაობას" ჰქონდა უფლება, რომ დაეტერორებინა ტელევიზიები, დაეხურა თოქ-შოუები, ეცემა ჟურნალისტები, იძულებით წაერთმია ქონება მედიამფლობელებისთვის, მათ შორის თქვენთვის და ყველას კარგად გვახსოვს presa.ge-ს საკითხი, ამ დროს კი, კერძო პირს უფლება არ აქვს, მიმართოს სასამართლოს", - ამბობს კობახიძე.

ჟურნალისტის მინიშნებაზე, როდესაც ხელისუფლება აკეთებს განმარტებებს, ეს უკვე ნიშნავს, რომ ხელისუფლება ჩართულია ამ საქმეში... - დეპუტატი პასუხობს:

„რა თქმა უნდა, მათი მიზანია, ხელისუფლება ჩაითრიონ ამ დავაში და თითოეულ ჩვენს განცხადებებში რაღაცა სათავისოდ დაიჭირონ. ჩვენ ვემიჯნებით ამ დავას, გადაწყვიტოს სასამართლომ. ძალიან ნათელია მათი მიზანი და არ გამოუვათ. რისი იმედიც აქვს გვარამიას ან „რუსთავი 2"-ს", მათი განზრახულობები სისრულეში ვერ იქნება მოყვანილი", - ამბობს კობახიძე.

წყარო: For.ge