„ყველამ ვიცით, როგორ, რა მეთოდებით ებრძოდა „ნაციონალური მოძრაობა" ოპოზიციას. ყველანაირ ბინძურ მეთოდს მიმართავდნენ: კომპრომატებს, დაჭერებს... სრული ტერორი იყო..." - აცხადებს „ქართული ოცნების" აღმასრულებელი მდივანი ირაკლი კობახიძე „პრაიმტაიმთან" საუბარში და აქვე დასძენს, რომ დღესდღეობით ყველა საქმე, რომელიც „ნაციონალურ მოძრაობას" უკავშირდება, გამჭვირვალედ მიმდინარეობს.
„ახლა თითოეული საქმე, რომლის საფუძველზეც „ნაციონალური მოძრაობის" ლიდერები არიან დაკავებული, გამჭვირვალეა. არ არის მისაღები, ვინმეს პოლიტიკოსის იმუნიტეტი მიენიჭოს მაშინ, როცა აშკარა დანაშაული აქვს ჩადენილი. პირადად ჩემთვის შერჩევითი სამართალი პრინციპულად მიუღებელია, სამართლიანობის აღდგენას პოლიტიკურმა კონიუნქტურამ არავითარ შემთხვევაში არ უნდა შეუშალოს ხელი. პრობლემას იმაში ვხედავ, რომ გარკვეული საქმეების განხილვა ზედმეტად დიდხანს გაიწელა. თეთრი ძაფით ნაკერი საქმეების განხილვას 9 თვეზე მეტი არ უნდა დასჭირვებოდა...
რა იყო ამის მიზეზი - პროკურატურა, სასამართლო თუ რაიმე სხვა, ეს მეორეხარისხოვანია, მთავარია, რომ ამ კონკრეტული საქმეების განხილვა ბევრად უფრო ხანმოკლე ვადებში იყო შესაძლებელი..." - განაცხადა კობახიძემ.
წყარო: „პრაიმტაიმი"
