აკადემიკოსი ელიზბარ ჯაველიძე „ქართული ოცნების" მიერ გატარებულ რეფორმებზე საუბრობს და ხელისუფლების ერთ-ერთ მთავარ მიღწევად ჯანდაცვის სისტემასა და სოფლის მეურნეობაში განხორციელებულ რეფორმებს მიიჩნევს. ამის შესახებ ჯაველიძე „კვირის ქრონიკას" ესაუბრა და ყოფილი ხელისუფლების პირობებში არსებულ ვითარებასა და დღევანდელ ვითარებას შორის არსებულ სხვაობაზე გაამახვილა ყურადღება.

„ხელისუფლების უბედურება არის ის, რომ არ შეუძლია თავისი საქმის წარმოჩენა. თავის დროზე ბიძინა ივანიშვილმა თქვა, რომ დემოკრატიულ სახელმწიფოში ხელისუფლება ტელევიზიას არ უნდა ფლობდეს და მან საკუთარი ტელევიზია დახურა, მაგრამ, რასაც აკეთებენ, ხალხმა არ იცის და პიარში აგებენ. გაკეთდა სათბურები, სადაც მოჰყავთ ჯანსაღი პროდუქცია, რომელიც გენმოდიფიცირებულ საკვებს ჩაანაცვლებს, მაგრამ ვინმემ იცის, რომ ასეთი სათბური არსებობს და ხალხი დასაქმებულია, რომ ჯანსაღი პროდუქცია მოჰყავთ?..

ვისაუბროთ სამედიცინო დაზღვევაზე, გაიხსენეთ, რამდენი ადამიანი კვდებოდა იმის გამო, რომ ოპერაციის ფული არ ჰქონდა. გაიხსენეთ, როგორ კეთდებოდა გადაუდებელი ოპერაციები, რის ფასად? ხალხს ბინებს აყიდვინებდნენ, ბანკის კრედიტებს აღებინებდნენ. მართალია, ეს სახელმწიფო ყველაფერს ვერ გასწვდება, მაგრამ ძვირადღირებულ ოპერაციებს აფინანსებს. თუმცა, სამწუხაროდ, ამ ყველაფერს ხალხი ვერ ხედავს. იმ ხალხს, ვინც ამბობს, დღევანდელი კვერცხი მირჩევნიაო, კითხვას ვუსვამ, - ეს კვერცხი გქონდათ 9 წლის მანძილზე სააკაშვილის რეჟიმის დროს? არ ჰქონიათ... დღეს მოინდომეს დედალი, არ გამოდის ასე უცბად", - აღნიშნავს ჯაველიძე.

წყარო:   „კვირის ქრონიკა"