დიასპორის საკითხებში საქართველოს სახელმწიფო მინისტრის მოადგილე, სანდრო ბრეგაძე გაზეთ „ასავალ-დასავალთან" საქართველოს ყოფილი პრეზიდენტის, ამჟამად ოდესის ოლქის გუბერნატორის მიხეილ სააკაშვილის სამომავლო გეგმებს აფასებს, რომელიც საქართველოში დაბრუნებას უკავშირდება.
ბრეგაძის განცხადებით სააკაშვილის საქართველოში დაბრუნება არარეალურია, რადგან იგი ქართული სამართალდამცველი ორგანოების მხრიდან იძებნება.
„სააკაშვილი მუდმივად აცხადებს, რომ უახლოეს ხანებში საქართველოში დაბრუნებას გეგმავს. არადა, იგი სისხლის სამართლის დამნაშავეა, რომელსაც საქართველოს სამართალდამცავი ორგანოები ეძებენ!
აქედან გამომდინარე სააკაშვილი კანონიერი გზებით საქართველოში ვერ დაბრუნდება და თუ დაბრუნდება - მხოლოდ შეიარაღებული ან სხვა სახის ძალადობრივი გადატრიალების გზით!
ოდესის გუბერნატორი სააკაშვილი იმასაც აცხადებს, რომ იგი არჩევნებამდე არ დაიცდის და მანამდე უნდა დაამხოს საქართველოს ხელისუფლება!
კიდევ ვიმეორებ - ძალიან სამწუხაროა, რომ უკრაინის ხელისუფლებას სააკაშვილის ასეთ არანორმალურ განცხადებებზე არავითარი რეაქცია არა აქვს, რაც საქართველოსა და უკრაინის მეგობრულ ურთიერთობას, რბილად რომ ვთქვათ, არ წაადგება!"- აღნიშნავს ბრეგაძე.
