დღეს „ქართული მისიის" გამგეობის წევრები, ვაზიანის დასახლებაში შეხვდნენ საბავშვო საფეხბურთო კლუბ „ვაზიანის" წარმომადგენლებს და ასევე დაესწრენ საფეხბურთო მატჩს.
„საფეხბურთო კლუბი „ვაზიანი" ამჟამად უკიდურესად რთულ ფინანსურ ვითარებაშია. კლუბის ხელმძღვანელები მხოლოდ საკუთარი ხარჯებით ცდილობენ, აღმოაჩინონ და აღზარდონ ნიჭიერი ბავშვები კარგ ფეხბურთელებად. გუნდს სასწრაფოდ ესაჭიროება დახმარება, რათა განხორციელდეს თუნდაც მცირე რაოდენობის საფეხბურთო ინვენტარის შეძენა. კლუბი „ვაზიანი" დაფუძნებულია ერთ-ერთი ადგილობრივი მცხოვრების ბ-ნ ბესო მალაშხიას და მისი ოჯახის წევრების თაოსნობით. ამ პატარა საბავშვო საფეხბურთო კლუბის მიზანია, აღზარდოს ჯანსაღი მომავალი თაობა და აღმოაჩინოს ნიჭიერი ბავშვები ვაზიანის დასახლებასა და მის მიმდებარე დასახლებებში. კლუბმა უკვე მოიგო რამდენიმე საფეხბურთო ტურნირი, მიუხედავად იმისა, რომ კლუბს არ გააჩნია ელემენტარული საფეხბურთო ინვენტარი. „ქართული მისია" მოუწოდებს ყველას, განსაკუთრებით კი ბიზნესორგანიზაციებს, რომ დააფინანსონ კლუბი თუნდაც მცირედი შენატანებით. „ქართულმა მისიამ" და საფეხბურთო კლუბმა „ვაზიანმა" დღეს უკვე გააფორმეს ურთიერთთანამშრომლობის მემორანდუმი, რომლის საფუძველზეც „ქართული მისია" ხელს შეუწყობს და დაეხმარება საფეხბურთო კლუბს განვითარებასა და აღმშენებლობაში", - განაცხადა „ქართული მისიის" გამგეობის წევრმა გიორგი ზარნაძემ.
