სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ სამების ახალგაზრდულ ცენტრში მაქსიმე აღმსარებლისადმი მიძღვნილი მეხუთე საერთაშორისო კონფერენცია გახსნა, რომელშიც ქართველი და უცხოელი მკვლევარები, მეცნიერები და სასულიერო პირები მონაწილეობენ.
უწმინდესის განცხადებით, ეს არის ძალიან მნიშვნელოვანი ღონისძიება, რომელიც ტარდება კონფერენციების სახით საქართველოში.
„მაქსიმე აღმსარებელი არის ის წმინდა მამა, რომლის შესახებ ყველაზე მეტად დაინტერესებული არიან მეცნიერები და წარსულშიც და დიდწილად დღესაც განსაკუთრებული ყურადღების ქვეშ არის ძიება მისი საფლავის, მისი ნაშრომების და შრომების შესახებ. ვფიქრობ, რომ ეს კონფერენცია შეიტანს დიდ წვლილს ამ ძიებაში. წარსულში ამით დაინტერესებულნი იყვნენ ჩვენი პატრიარქები, ასევე ნიკო მარი, კორნელი კეკელიძე და სხვები. თანდათან ჩანს, რომ მაქსიმე აღმსარებელი დასაფლავებულია საქართველოში და ეს კიდევ ერთხელ მიუთითებს იმაზე, თუ რამდენად მნიშვნელოვანია ძიება ამ მიმართულებით", - ბრძანა უწმინდესმა.
დღესვე ღონისძიების ორგანიზატორებმა პატრიარქს მაქსიმე აღმსარებლის ხატი და მის შესახებ გამოცემული წიგნიც აჩუქეს.
