„პატრიოტთა ალიანსის" ლიდერი ირმა ინაშვილი აცხადებს, რომ რესპუბლიკური პარტიის მინისტრები საგარეჯოში თამარ ხიდაშელის არჩევნებში გასამარჯვებლად აქტიურად მუშაობენ.
„ისინი დარაზმულები არიან, როგორმე გაიყვანონ თამარ ხიდაშელი. დავით სერგეენკო, რომელსაც ადამიანურად ვცემდი პატივს, სამწუხაროდ, ისიც ჩამოვიდა საგარეჯოში და მედპერსონალს წარუდგინა თამარ ხიდაშელის კანდიდატურა. მინისტრები არ უნდა იყვნენ ასე პირდაპირ ჩართულები საარჩევნო პროცესში. მოვითხოვე დავით სერგეენკოსთან შეხვედრა, მინდოდა, მისთვის გადამეცა ჩემი ამომრჩევლის გულისტკივილი, და ასევე მეთქვა, რომ ყველა კანდიდატისთვის თანაბარი უნდა იყოს წინასაარჩევნო გარემო. თუ ყველა მინისტრი ჩამოვა და მხარს დაუჭერს რესპუბლიკელების კანდიდატს, თუ გამოიყენებენ ადმინისტრაციულ რესურსს, პედაგოგებს, ექიმებს, ჯარს, მაშინ ტანკებიც ჩამოიყვანონ საგარეჯოში და ამით დავასრულოთ არჩევნები", - განაცხადა ინაშვილმა.
წყარო: გაზეთი „კვირის ქრონიკა"
(მოამზადა ალა გრიგალაშვილმა)
