გაზეთი „პრაიმტაიმი" პარლამენტის თავმჯდომარის პირადი დაცვის წევრზე წერს. გამოცემის ინფორმაციით, გიორგი რუბაშვილმა ცოტა ხნის წინ დასაცავი ობიექტის დაცვაზე უარი განაცხადა, სახელმწიფო დაცვის სპეციალურ სამსახურში პატაკი დაწერა და ოდესაში მიხეილ სააკაშვილთან გაემგზავრა.

ამავე ინფორმაციით, რუბაშვილი ამჟამად სწორედ ოდესის გუბერნატორისა და საქართველოს ექსპრეზიდენტის, მიხეილ სააკაშვილის პირადი დაცვის სამსახურში აგრძელებს საქმიანობას.

დატოვა თუ არა გიორგი რუბაშვილმა პარლამენტის თავმჯდომარის პირადი დაცვის შემადგენლობა? ამის გასარკვევად პარლამენტის პრესსამსახურს დავუკავშირდით, სადაც განგვიმარტეს, რომ ამ საკითხზე კომენტარს ვერ გააკეთებენ და სახელმწიფო დაცვის სპეციალურ სამსახურში გადაგვამისამართეს. აღნიშნულ უწყებაში ჩვენ ინფორმაცია წერილობით გამოვითხოვეთ. მიღებული პასუხით ირკვევა, რომ გიორგი რუბაშვილი „2015 წლის 15 ივნისს განთავისუფლდა სამსახურიდან პირადი პატაკის საფუძველზე". სახელმწიფო დაცვის სამსახურში არ აკონკრეტებენ, რა გახდა პატაკის დაწერის მიზეზი, ან ამჟამად სად აგრძელებს საქმიანობას რუბაშვილი.

გიორგი რუბაშვილმა სახელმწიფო დაცვის სპეციალურ სამსახურში მუშაობა 2004 წელს დაიწყო. ამ დროიდან 2007 წლამდე ის ობიექტების დაცვის ქვედანაყოფში მუშაობდა, 2007-2015 წლებში კი პირადი დაცვის ქვედანაყოფში განაგრძო საქმიანობა. ის, თავის დროზე, პრეზიდენტ სააკაშვილის დაცვაშიც მუშაობდა და როგორც ჩანს, კვლავ დაცვის ძველ ობიექტს დაუბრუნდა სამუშაოდ.

წყარო: primetimenews