„ის, რაც „რუსთავი 2"-თან დაკავშირებით აგორდა, არა მგონია, „ნაციონალების" სასარგებლოდ დასრულდეს, რადგან ამ ტელევიზიას არც სათანადო მხარდაჭერა აქვს და არც 2003 წელია", - აცხადებს ვალერი ხაბურძანია „კვირის პალიტრასთან" ინტერვიუში. უშიშროების ყოფილი მინისტრის თქმით, ნაციონალები მოკლე გამოსვლებით არ დაკმაყოფილდებიან. „ყველანაირი სცენარი სისხლიანი გაგრძელებისკენ მიდის", - აღნიშნავს ყოფილი მინისტრი.
კითხვაზე - ვინ არის პროცესების დირიჟორი? - ხაბურძანია პასუხობს:
„უკვე შევთანხმდით, რომ ხელწერა ნაცნობია, ნაცნობია მოქმედი პირები თავისი განზრახვებითა და მიზნებით. არსებობს კითხვები მსოფლმხედველობის მიხედვით: ერთნი პროცესების ავტორად ხელისუფლებას ასახელებენ, რომელსაც ნაციონალების გაქრობა სურს პოლიტიკური ორბიტიდან და ეს სურვილები განსაკუთრებით არჩევნების მოახლოების პარალელურად მძაფრდება...
მეორე ნაწილს სჯერა, რომ ნაციონალები ყველაფერზე წავლენ იმის გამო, რომ ხელიდან არ გამოეცალოთ ის დასაყრდენი, რომლითაც რევოლუციის მოხდენა ერთხელ უკვე შეძლეს. მით უმეტეს, რომ ყოფილ ხელისუფლებას მალე გამოეცლება პროცესების მართვის დასაყრდენი ეროვნულ ბანკსა და საკონსტიტუციო სასამართლოში, საკონსტიტუციო ვადების გასვლის გამო... ტელეკომპანიის დაკარგვის შემთხვევაში ეს პოლიტიკური ძალა რეალურად დგება პოლიტიკური ორბიტიდან გაქრობის საფრთხის წინაშე...
არსებობს მესამე მოსაზრება, რომ პროცესებს მართავს ოლიგარქი კოლომოისკი, რომელიც სააკაშვილის დაუძინებელი მტერია და ნებისმიერ თანხას გამოდის მისი კომპრომეტირებისთვის...
სამივე პოზიციას თანაბრად აქვს მიზეზი, იყოს პროცესების დირიჟორი. სწორედ ამ დროს არსებობს ყველაზე სახიფათო მოლოდინი, რომ მღვრიე წყალში თევზი სრულიად უცნობმა მეთევზემ დაიჭიროს, რაც ქართულ პოლიტიკურ დინებას სულ სხვა კალაპოტში გადაიყვანს..." - განაცხადა ხაბურძანიამ.
წყარო: გაზეთი „პრაიმტაიმი"
(მოამზადა ალა გრიგალაშვილმა)
