19 ქვეყნის საგარეო საქმეთა მინისტრი, ვენაში გამართულ მოლაპარაკებებზე, სირიაში გარდამავალი მთავრობის შექმნაზე შეთანხმდა. მხარეებმა 9-პუნქტიანი დოკუმენტი მიიღეს, რომლის მიხედვითაც, ჰუმანიტარული დახმარების მიწოდება უზრუნველყოფილი უნდა იყოს სირიის მთელ ტერიტორიაზე და „ისლამური სახელმწიფო" და გაერო-ს მიერ ექსტრემისტული ორგანიზაციების სიაში შეყვანილი სხვა დაჯგუფებები უნდა განადგურდეს.
სირიაში უნდა შენარჩუნდეს ერთიანი საერო სახელმწიფო, უნდა გააქტიურდეს კონფლიქტის დასრულებისკენ მიმართული ძალისხმევა. გარდა ამისა, ჩატარდება საერთაშორისო დონის შეხვედრა, რომელშიც ბაშარ ალ-ასადის მთავრობისა და ოპოზიციის წევრები მიიღებენ მონაწილეობას. ამ შეხვედრის შედეგად, უნდა შეიქმნას ახალი გარდამავალი მთავრობა, რომელიც ქვეყანას ახალ არჩევნებამდე უხელმძღვანელებს, რის შემდეგაც სირიაში ახალ კონსტიტუციას მიიღებენ. პოლიტიკურ პროცესში მონაწილე ქვეყნები სირიის მთელ ტერიტორიაზე მშვიდობიანი ზავის დადებას უზრუნველყოფენ, თუმცა „ისლამურ სახელმწიფოსთან" სამშვიდობო შეთანხმება არ დაიდება.
აშშ-ის სახელმწიფო მდივანმა მოლაპარაკებების დასრულების შემდეგ განაცხადა, რომ მოსკოვისა და ვაშინგტონის პოზიცია ბაშარ ალ-ასადის მომავლის შესახებ კვლავ განსხვავებულია.
რუსეთის საგარეო საქმეთა მინისტრის სერგეი ლავროვის განცხადებით, ასადის ბედი სირიელმა ხალხმა უნდა გადაწყვიტოს.
ვენაში გამართულ მოლაპარაკებებში გაერო-ს, ევროკავშირის, რუსეთის, აშშ-ის, გერმანიის, საფრანგეთის, ირანისა და სხვა სახელმწიფოების წარმომადგენლები მონაწილეობდნენ. მორიგი შეხვედრა ორ კვირაში გაიმართება.
