აშშ-ის სადაზვერვო სამსახური ვარაუდობს, რომ ეგვიპტეში, რუსული სამგზავრო თვითმფრინავის ჩამოვარდნის მიზეზი ბორტზე ბომბის აფეთქება გახდა, თუმცა აღიარებს, რომ საბოლოო დასკვნების გაკეთება ჯერჯერობით ნაადრევია.
სააგენტო „ასოშიეითედ პრესის" ცნობით, აშშ-ის დაზვერვის ვერსია ეფუძნება გარკვეულ მონაცემებს, რომლის მიხედვითაც, ასაფეთქებელი მოწყობილობა ლაინერის ბორტზე „ისლამური სახელმწიფოს" ეგვიპტური ფრთის მებრძოლებმა დაამონტაჟეს.
სააგენტო „როიტერის" ცნობით, რუსული ლაინერის ბორტზე ბომბის აფეთქების ვერსიას განიხილავენ ევროპულ სპეცსამსახურებშიც.
რუსული ავიაციის ისტორიაში ყველაზე მასშტაბური ავიაკატასტროფა 31 ოქტომბერს მოხდა. სამგზავრო ლაინერი, რომელიც შარმ-ელ-შეიხიდან სანკტ-პეტერბურგში მიემგზავრებოდა, სინაის ნახევარკუნძულზე ჩამოვარდა. ბორტზე მყოფი 224 ადამიანი დაიღუპა.
