საპარლამენტო უმრავლესობის წევრი ალექსანდრე ქანთარია სახელმწიფოს გადატრიალების მცდელობის მუხლით აღძრულ საქმეზე საუბრობს და აცხადებს, რომ თუკი იქნება უტყუარი მტკიცებულებები და დადასტურდება, რომ „ნაციონალური მოძრაობა" რევოლუციის მოწყობას გეგმავდა, საქმეში მონაწილე ყველა პირი აუცილებლად დაისჯება. ამის შესახებ ქანთარიამ „კვირის ქრონიკასთან" ინტერვიუში ისაუბრა და აქვე განაცხადა, რომ საზოგადოება მშვიდად უნდა იყოს, რადგან „ნაციონალური მოძრაობა" ვერანაირ სისხლისღვრასა და რევოლუციას ვერ მოახდენს.
„აღძრულია საქმე 315-ე მუხლით, რაც გულისხმობს ხელისუფლების დამხობის მცდელობას ანტიკონსტიტუციური გზებით, გამოქვეყნებულია აუდიოჩანაწერები, საიდანაც დასტურდება, რომ სააკაშვილი ინსტრუქტაჟს აძლევს მის თანაგუნდელებს, როგორ უნდა მოახდინონ სისხლისღვრა, მოაწყონ რევოლუცია და ეს უნდა მოხდეს „ბოევიკების" გამოყენებით. ჩვენ გვახსოვს ისიც, როცა სააკაშვილის რეჟიმის დროს ნაკლებ უწყინარი ჩანაწერების გამო ხალხს ციხეებს ახდევინებდნენ. რა თქმა უნდა იგივე არ უნდა გავაკეთოთ, მაგრამ, თუკი უტყუარი მტკიცებულებები დაიდება, ბუნებრივია, ისინი სასჯელს ვერ ასცდებიან. სად დააპატიმრებენ დამნაშავეებს, პარლამენტში, ქუჩაში თუ სახლებში, ამას უკვე არსებითი მნიშვნელობა აღარ აქვს. როდის და რომელ დაკითხვაზე წარედგინებათ ბრალი, ეს უკვე გამოძიების საქმეა.
საზოგადოება უნდა იყოს მშვიდად, „ნაციონალური მოძრაობა" ვერანაირ სისხლისღვრასა და რევოლუციას ვერ მოახდენს. ჩვენ ვართ 2015 წელში და არა 2003-ში", - განაცხადა ქანთარიამ.
წყარო: „კვირის ქრონიკა"
