კომპანია „Airbus"-ის ხელმძღვანელის ფაბრის ბრეჟიეს განცხადებით, ვერსია, რომ ეგვიპტეში რუსული სამგზავრო თვითმფრინავის ჩამოვარდნის მიზეზი ტექნიკური გაუმართაობა იყო, ჯერჯერობით არ დასტურდება.

ეგვიპტეში მომხდარი ავიაკატასტროფის გამოძიება ამ დრომდე გრძელდება.

„BBC"-ის ცნობით, თვითმფრინავის ჩამოვარდნის მიზეზების დასადგენად, საკუთარი გამოძიება ეგვიპტემაც დაიწყო. ეგვიპტური წყაროს ცნობით, ქვეყნის სპეცსამსახურები ყველა ვარიანტს, მათ შორის ლაინერის ბორტზე ასაფეთქებელი მოწყობილობის დამონტაჟების ვერსიასაც განიხილავენ.

რუსეთის პრემიერ-მინისტრის დიმიტრი მედვედევის განცხადებით, ავიაკატასტროფის ერთ-ერთ მიზეზად ტერაქტის ვერსიაც განიხილება.

რუსული ავიაციის ისტორიაში ყველაზე მასშტაბური ავიაკატასტროფა 31 ოქტომბერს მოხდა. ავიაკომპანია „კოგალიმავიას" სამგზავრო ლაინერი Airbus-321, რომელიც შარმ-ელ-შეიხიდან სანკტ-პეტერბურგში მიემგზავრებოდა, სინაის ნახევარკუნძულზე ჩამოვარდა. ბორტზე მყოფი 224 ადამიანი დაიღუპა.