აშშ-ის პრეზიდენტის ბარაქ ობამას თანაშემწე სელესტ უოლანდერი რუსულ გამოცემა „მედუზასთან" ინტერვიუში ამბობს, რომ რუსეთმა საქართველოში განხორციელებული ინტერვენციის დროს მიღებული გაკვეთილები აითვისა:

„სირიაში რუსეთმა მსოფლიოს საკუთარი შეიარაღებული ძალების ახალი შესაძლებლობები დაანახა. კონკრეტული მაგალითების მოყვანა არ შემიძლია, თუმცა ნამდვილად დავრწმუნდით, რომ რუსეთს შეუძლია, ტექნოლოგიური თვალსაზრისით ძალიან რთული ოპერაციების ჩატარება და საქართველოში ინტერვენციის დროს მიღებული გაკვეთილები აითვისა. რუსეთს ახლა ძალიან ეფექტური შეიარაღებული ძალები ჰყავს.

ეს ქმნის საფრთხეს რუსეთის მეზობელი ქვეყნებისთვის, მათ შორის NATO-ს წევრებისთვისაც. NATO რუსეთს პირდაპირ მოწინააღმდეგად არ მიიჩნევს, თუმცა იძულებულია, საკუთარი წევრების უსაფრთხოების უზრუნველსაყოფად, ზომები მიიღოს. 2014 წლიდან NATO-მ ურთიერთმოქმედების გაძლიერებისკენ მიმართული სწავლების სერია ჩაატარა", - განაცხადა უოლანდერმა.

ჟურნალისტის მიერ დასმულ შეკითხვაზე, რატომ არ მიიღო NATO-მ ანალოგიური ზომები „საქართველოში მომხდარი კონფლიქტის" შემდეგ, სელესტ უოლანდერმა განაცხადა, რომ განსხვავება იმაშია, რომ 2008 წელს რუსეთი „საქართველოს იმ რაიონებში შეიჭრა, სადაც რუსული ჯარები იმყოფებოდნენ".

„საქართველოში ინტერვენციამ დაარღვია ევროპაში უსაფრთხოების შესახებ უამრავი შეთანხმება და გაერო-ს ქარტია. ჩვენ ამის შესახებ მაშინვე განვაცხადეთ. ჩემი მოსაზრებით, განსხვავება იმაშია, რომ 2008 წელს რუსეთი საქართველოს იმ რაიონებში შეიჭრა, სადაც უკვე იმყოფებოდნენ რუსული ჯარები (მშვიდობისმყოფელთა სახით). ეს არ ნიშნავს, რომ ინტერვენცია დაშვებული იყო, თუმცა რუსეთის ხელმძღვანელობა ფიქრობდა, რომ ეს შერჩებოდა. დონბასში კი, რუსული ჯარები არ იყვნენ.

შეიძლება ითქვას, რომ საქართველოში ინტერვენცია წინ უსწრებდა მოვლენებს უკრაინის აღმოსავლეთში, თუმცა შედეგების თვალსაზრისით, დონბასი გაცილებით უფრო სარისკო ოპერაცია იყო. მოვლენები უკრაინასა და სირიაში გვიჩვენებს, რომ რუსეთი მზად არის, სამხედრო ძალა სულ უფრო სარისკო ოპერაციებში გამოიყენოს", - განაცხადა ობამას თანაშემწემ.