რუსეთის შსს-ს მოსკოვის სამმართველოს უფროსმა ანატოლი იაკუნინმა, ტელეკომპანია „როსია24"-ის ეთერში განაცხადა, რომ მოსკოვის პოლიცია ექსტრემისტული საფრთხეების გამო გაძლიერებულ რეჟიმში მუშაობს.
„მოსკოვის შინაგან საქმეთა ორგანოების მუშაობა გავაძლიერეთ იმ საფრთხეების გამო, რომლის შესახებაც ინფორმაციას სხვადასხვა წყაროდან ვიღებთ", - განაცხადა ანატოლი იაკუნინმა.
იაკუნინის განცხადებით, პოლიცია ამოწმებს სამეწარმეო ზონებს, ბაზრებსა და ყველა იმ ადგილს, სადაც შესაძლოა, უცხო ქვეყნების მოქალაქეები ან ტერორიზმთან დაკავშირებული პირები იმყოფებოდნენ. მისი თქმით, გაძლიერებულია სატრანსპორტო საშუალებების, მათ შორის საზოგადოებრივი ტრანსპორტისა და მეტროპოლიტენის კონტროლი.
პარალელურად, რუსეთის სამართალდამცავმა ორგანოებმა სოციალური ქსელებით გავრცელებული ინფორმაციის შემოწმება დაიწყეს, რომლის მიხედვითაც, ცოტა ხნის წინ რუსეთში ჩასული 18 თვითმკვლელი ტერორისტი მოსკოვსა და ყაზანში ტერაქტებს გეგმავს. შეტყობინებაში ასევე ნათქვამი იყო, რომ მოსახლეობამ სახალხო ადგილებში ყოფნისგან თავი უნდა შეიკავოს, განსაკუთრებით კი, ეს სავაჭრო ცენტრებს ეხება.
რუსეთის შსს-ს ოფიციალური წარმომადგენელის ელენა ალექსეევას განცხადებით, შსს ყველა საჭირო ზომას მიმართავს აღნიშნული ტექსტის გავრცელების წყაროს დასადგენად.
რუსეთში აღნიშნულ ინფორმაციას „პროვოკაცია" უწოდეს, რომლის მიზანიც საზოგადოებაში დაძაბულობისა და პანიკის დათესვაა.
