უკრაინის პოლიციის მაღალჩინოსნად კიდევ ერთი ქართველი დაინიშნა. ქვეყნის ეროვნული პოლიციის შიდა უსაფრთხოების დეპარტამენტს გიორგი გრიგალაშვილი უხელმძღვანელებს. უკრაინის პრეზიდენტმა პეტრო პოროშენკომ გრიგალაშვილს უკრაინის მოქალაქეობა უკვე მიანიჭა.
„თქვენ აჩვენეთ საქართველოს სამართალდამცავი სისტემის რეფორმის შედეგი საქართველოში და უნდა აჩვენოთ შედეგი უკრაინაშიც. თქვენი პროფესიონალიზმისა და პატიოსნების იმედი მაქვს", - განუცხადა გრიგალაშვილს პოროშენკომ.
გრიგალაშვილის უწყების მთავარი ამოცანა პოლიციელების მიერ ჩადენილი დანაშაულის, მათ შორის, კორუფციის გამოვლენაა. უკრაინის ეროვნულ პოლიციას ასევე, სააკაშვილის მთავრობის ყოფილი წარმომადგენელი ხატია დეკანოიძე ხელმძღვანელობს.
გიორგი გრიგალაშვილი საქართველოს საპატრულო პოლიციას 2006-2012 წლებში ხელმძღვანელობდა.
