რუსეთის ფედერალური უსაფრთხოების სამსახურის უფროსის ალექსანდრ ბორტნიკოვის განცხადებით, რუსეთის ფედერალური უსაფრთხოების სამსახურმა ეგვიპტეში რუსული ლაინერის A321-ის კატასტროფას ტერაქტის კვალიფიკაცია მისცა.

„ერთმნიშვნელოვნად შეიძლება ითქვას, რომ ეს ტერორისტული აქტია“, - განაცხადა ალექსანდრ ბორტნიკოვმა.

 მისი თქმით, ამ დასკვნის გაკეთების საფუძველს ექსპერტიზა იძლევა, რომელმაც თვითმფრინავის ელემენტებსა და პირად ნივთებზე ასაფეთქებელი საშუალების კვალი აღმოაჩინა.

რუსული ავიაკომპანია „კოგალიმავიას“ ლაინერი Airbus А-321 სინაის ნახევარკუნძულზე, პროვინცია ჩრდილო სინაის მთიან რაიონში, ქალაქ ელ-არიშის სიახლოვეს 31 ოქტომბერს ჩამოვარდა. შედეგად ბორტზე მყოფი 224 ადამიანი დაიღუპა, მათ შორის 25 ბავშვი.