პრეპარატ „ნიმესილის" მავნებლობასთან დაკავშირებით ელექტრონულ მედიაში არაერთი სტატია გამოქვეყნდა. აღნიშნული მედიკამენტი ცოტა ხნის წინ რეცეპტით გასაცემ პრეპარატთა სიაში შეიტანეს. რა ოდენობით შეიძლება მისი მიღება, რომ ადამიანის ჯანმრთელობას საფრთხე არ შეექმნას და რა გვერდითი მოვლენები ახასიათებს ამ მედიკამენტს - აღნიშნულ საკითხზე ფარმაცევტული საქმიანობის სამმართველოს მთავარი სპეციალისტი ნიკო გონგაძე „ალიას" ესაუბრა.
„პრეპარატი, როგორც ტკივილგამაყუჩებელი, საკმაოდ ეფექტურია, მაგრამ სამწუხაროდ, საქართველოში მოსახლეობა მას არარაციონალურად იყენებდა. ინსტრუქციაშიც მითითებულია, რომ ეს პრეპარატი არ უნდა იქნეს ხანგრძლივი დროით გამოყენებული და მის გამოყენებას სჭირდება ლიმიტირებული პერიოდი. ნაცვლად იმისა, ნებისმიერი სახის თავის თუ რეპროდუქციული ხასიათის ტკივილის დროს, მათ ხშირად იყენებდნენ, განსაკუთრებით ქალბატონები და იყენებენ დღესაც. აქედან გამომდინარე, ჩვენ ის შვიტანეთ რეცეპტით გასაცემ პრეპარატთა სიაში. ამ პრეპარატს ახასიათებს გვერდითი მოვლენები, ეს მინიმალიზებული იქნება იმ შემთხვევაში, თუ პრეპარატი სწორად იქნება გამოყენებული. რახან ის ეფექტური ტკივილგამაყუჩებელია, მოსახლეობა აღარ უყურებს მის გვერდით ეფექტებს და ტკივილის სწრაფად მოხსნის გამო ხშირად იღებს. გვერდითი ეფექტები კი დაკავშირებულია ღვიძლის დაზიანებასთან, გულ-სისხლძარღვთა გართულებებთან და ა.შ."- - განაცხადა გონგაძემ.
მისი თქმით, იმისთვის, რომ პრეპარატმა გვერდითი ეფექტებით ჯანმრთელობა არ დააზიანოს, მისი მიღება დღეში შეიძლება მხოლოდ 2-ჯერ.
წყარო: გაზეთი „ალია"
