„BBC"-ის ცნობით, ნიგერიაში, ქვეყნის აღმოსავლეთში, ქალაქ იოლას ბაზრის ტერიტორიაზე, საღამოს საათებში აფეთქება მოხდა. რის შედეგადაც 30-ზე მეტი ადამიანი დაიღუპა და 80-მდე დაშავდა.

თვითმხილველების ცნობით, აფეთქება იმდენად ძლიერი იყო, რომ ხმა მთელ ქალაქში ისმოდა.

პასუხისმგებლობა ტერაქტზე ჯერჯერობით არცერთ დაჯგუფებას არ აუღია, თუმცა, „BBC"-ის ცნობით, მსგავსი ტიპის ტერაქტებს ნიგერიაში, როგორც წესი, ექსტრემისტული დაჯგუფება „ბოკო ჰარამი" აწყობს.

ექსპერტები აღნიშნავენ, რომ ბოლო პერიოდში მებრძოლებმა სამოქალაქო ობიექტებზე, მათ შორის ბაზრებსა და მეჩეთებზე თავდასხმები გაახშირეს.

მიმდინარე წლის მარტში, დაჯგუფებამ „ისლამური სახელმწიფოს" ერთგულების ფიცი დადო.