გამოცემა „თუდეი ზამანის" მიერ გავრცელებული ინფორმაციით, თურქეთში „ისლამური სახელმწიფოს" სამი წევრი დააკავეს. ყველა მათგანი პარიზის ტერაქტებთან კავშირშია ეჭვმიტანილი.
სპეცოპერაცია თურქეთის პროვინცია ანტალიაში ჩატარდა. დაკავებულთა შორის ბელგიის მოქალაქე, მაროკოელი 26 წლის აჰმეტ დაჰმანია, რომელიც სამართალდამცველებმა ხუთვარსკლავიან სასტუმროში აიყვანეს. დაჰმანი პარიზის ტერაქტებისთვის სამიზნეების შერჩევაშია ეჭვმიტანილი.
სამართალდამცველებმა დააკავეს ასევე ორი ეთნიკური სირიელი აჰმეტ ტაჰირი და მუჰამად ვერდი, რომლებიც სირიიდან თურქეთში ყალბი პასპორტებით ჩავიდნენ. მათ დაჰმანი სირიაში უნდა გადაეყვანათ.
მიმდინარე კვირას თურქეთში, სტამბოლის ათათურქის სახელობის აეროპორტში „ისლამურ სახელმწიფოსთან" კავშირში მყოფი 8 მაროკოელი დააკავეს, რომლებიც გერმანიაში არალეგალური გზით აპირებდნენ ჩასვლას.
