აშშ-ს პრეზიდენტი რუსეთს სირიის ოპოზიციასთან ბრძოლის ნაცვლად, "ისლამურ სახელმწიფოსთან" ბრძოლისკენ მოუწოდებს.
ბარაქ ობამას განცხადებით, რუსეთმა უნდა მიიღოს სტრატეგიული გადაწყვეტილება და დაკავდეს ჯიჰადისტებთან ომით და არა სირიის ოპოზიციის ძალებთან, რომლებიც ცდილობენ პრეზიდენტ ბაშარ ასადის გადაგდებას.
"რუსეთის თავდაპირველი სამხედრო ოპერაციები არ უწყობდნენ ხელს ძალისხმევას "ისლამური სახელმწიფოს" შესაჩერებლად და გარკვეულწილად ის გააძლიერეს კიდეც", - განაცხადა ამერიკის პრეზიდენტმა. მისი თქმით, რუსეთის პრეზიდენტს უთხრა, რომ მათ უნდა დაარტყას, ვინც რუსეთის მოქალაქეებს კლავდა.
ობამას განცხადებით, რუსეთს ოფიციალურად არ დაუდასტურებია თავისი მხარდაჭერა იმ გეგმისადმი, რომელიც ბაშარ ასადის ხელისუფლებიდან ჩამოშორებას ითვალისწინებს, მაგრამ ამ ქვეყანაში პოლიტიკურ გარდამავალ პროცესზე დათანხმდა.
