არასამთავრობო სექტორი და მედიის წარმომადგენლები პირად ცხოვრებასთან დაკავშირებული კადრების განადგურებას მოითხოვენ. მსგავსი ქმედებების პრევენციისთვის კი კონკრეტული ინიციტივით გამოდიან.
სახალხო დამცველი, არასამთავრობო ორგანიზაციები და საზოგადოების წარმომადგენლები აცხადებენ, რომ ფარული ჩანაწერების ის ნაწილი, რომელიც ადამიანთა პირად ცხოვრებას ასახავს, აუცილებლად უნდა განადგურდეს.
„პირადი ცხოვრების ამსახველი მასალები უნდა განადგურდეს. ეს არ ეხება კონკრეტული დანაშაულის შესახებ არსებულ ვიდეომასალებს, რომელიც წამების ფაქტებს ან პოლიტიკურ ოპონენტებზე თვალთვალს შეიცავს. რაც შეეხება პირად ინფორმაციას - უნდა განადგურდეს."-განაცხადა უჩა ნანუაშვილმა.
გაზეთ „რეზონანსის" მთავარი რედაქტორი, ლაშა ტუღუში თვლის, რომ აღნიშნული მასალები დიდი ხნით ადრე უნდა განადგურებულიყო.
„ ისეთი ტიპის მასალები, რომელიც კანონდარღვევების შესახებ ინფორმაციას შეიცავს, არ უნდა განადგურდეს. რაც შეეხება პირადი ცხოვრების ამსახველ კადრებს, აქამდეც უნდა განადგურებულიყო."- აღნიშნა ლაშა ტუღუშმა.
„საერთაშორისო გამჭვირვალობა-საქართველოს" აღმასრულებელი დირექტორის, ეკა გიგაურის თქმით, 17500 ფაილიდან პირადი ცხოვრების ამსახველ კადრებს 94 შეიცავს. გიგაურმა აღნიშნა, რომ სახელმწიფო ინტერესების მიუხედავად, პირადი ცხოვრების ხელშეუხებლობა აუცილებელია.
იმისთვის, რომ უკანონო თვალთვალი და უკანონო ჩანაწერების გაკეთება მომავალშიც არ განხორციელდეს, საზოგადოებისა და მედის ნაწილმა საკანონმდებლო ინიციატივით პარლამენტს მიმართა. აღნიშნული საკანონმდებლო ინიციატივის განხილვა ხვალ დაიწყება.
