საფრანგეთის პრეზიდენტმა ფრანსუა ოლანდმა მოსკოვში, რუსეთის პრეზიდენტ ვლადიმირ პუტინთან შეხვედრის შემდეგ განაცხადა, რომ რუსეთი და საფრანგეთი „ისლამურ სახელმწიფოსთან" ერთობლივ ბრძოლაზე შეთანხმდნენ.
მისი თქმით, ორი ქვეყანა საჰაერო დარტყმების მიტანისას კოორდინირებულად იმოქმედებს. იგეგმება ავიაიერიშების გააქტიურებაც.
რუსეთის პრეზიდენტ ვლადიმირ პუტინის განცხადებით, მხარეები ტერორიზმის საკითხებზე ოპერატიული ინფორმაციის გაცვლის ხარისხს გაზრდიან.
„დოიჩე ველეს" ცნობით, მოსკოვმა ასევე პირობა დადო, რომ სირიაში მოქმედი ე.წ. ზომიერი ოპოზიციის ძალებზე ავიადარტყმებისგან თავს შეიკავებს.
ფრანსუა ოლანდმა შეხვედრაზე კიდევ ერთხელ დაადასტურა, რომ სირიის პრეზიდენტმა ბაშარ ალ-ასადმა თანამდებობა უნდა დატოვოს. ვლადიმირ პუტინმა კი, თავის მხრივ, აღნიშნა, რომ ასადის არმია „მოკავშირეა ტერორიზმთან ბრძოლაში".
საფრანგეთმა „ისლამური სახელმწიფოს" წინააღმდეგ ბრძოლის გააქტიურება 13 ნოემბერს განხორციელებული ტერაქტების შემდეგ გადაწყვიტა.
