საქართველოს სპორტისა და ახალგაზრდობის საქმეთა მინისტრის ტარიელ ხეჩიკაშვილის განცხადებით საქართველოს ფეხბურთის ფედერაცია ქართული ფეხბურთის განვითარების გეგმას უახლოეს მომავაში წარადგენს, რაც ვითარებას საგრძნობლად შეცვლის.
„აქამდე ფეხბურთის განვითარების არავითარი გეგმა არ არსებობდა და არსებული გარემო არაწესიერ ხალხს იზიდავდა. როცა სისტემა აიწყობა და კონტროლი გამკაცრდება, ასეთი გარემო მათთვის არასახარბიელო გახდება და სხვა ქვეყანას მოძებნიან. საზოგადოება მალე იხილავს ფედერაციის მიერ წარმოდგენილ პროგრამას, რომელიც მზადდება და რომლითაც კლუბები თანაბარ პირობებში ჩადგება, იქნება მონიტორინგი..." - განაცხადა ტარიელ ხეჩიკაშვილმა გადაცემაში „2030."
„საზოგადოებას უფლება აქვს იცოდეს, რაში იხარჯებოდა ათეულობით მილიონი ლარი. ხელფასები ქართულ რეალობასთან შეუსაბამო და არნახულად მაღალი იყო, შედეგები კი - დაბალი. კლუბები 43 მილიონით ფინანსდებოდა, მწვრთნელებს კი, ხელფასი ასეულობით ათასი ჰქონდათ. ეს ყველაფერი მენეჯმენტის ბრალი იყო. ჩვენ არ ვაპირებთ სახელმწიფო თანხების ასე განიავებას. კლუბებმა ნება იბოძონ და კერძო ინვესტორები მოიზიდონ. თუ ფეხბურთის მიმართ ნდობა არ აღსდგა, არცერთი ბიზნესმენი ფეხბურთში ფულს არ ჩადებს." - განაცხადა მინისტრმა.
