„რუსეთ-თურქეთს შორის არსებული დაძაბული ვითარების ფონზე საქართველომ პოლიტიკური მიზანშეწონილობიდან გამომდინარე უნდა იმოქმედოს", - აცხადებს მამუკა არეშიძე. ექსპერტი მიიჩნევს, რომ საქართველოს ხელისუფლების პოზიცია უნდა იყოს დაკვირვების რეჟიმში, ძალიან ზოგადი და ფრთხილი.
„ყურადღება უნდა მივაქციოთ იმას, რომ ისეთი მნიშვნელოვანი პარტნიორი, როგორიც არის აზერბაიჯანი, უაღრესად თავშკავებული იქნება. მაინცდამაინც არც NATO-ს წევრი ქვეყნების აქტიურობა შეიმჩნევა. ჩვენს ძლიერ სივრცეში, როდესაც 2 ძლიერი ქვეყანა ერთმანეთს არის დაპირისპირებული, ეს აუცილებლად შეგვეხება, მაგრამ მაინც ფრთხილად უნდა ვიყოთ. თუ ყველაფერი ჩაიფარცხა და შემოიფარგლა მხოლოდ თვითმფრინავის ჩამოგდებით და რუსეთის მიერ ჰუმანიტარული ტვირთის დაბომბვით, მაშინ არაფერი არ შეგვეხება. მაგრამ თუ ესკალაცია და სამხედრო დაპირისპირება მოხდა და რუსეთმა სამხრეთ კავკასიაში აქტივობა მოინდომა, ამ შემთხვევაში რაღაც პოზიცია უნდა დაიკავოთ. თურქეთის მიერ უკანდახევის ნიშნებიც უკვე არის. მან განაცხადა, არ ვიცოდი, რომელ ქვეყნის თვითმფრინავი იყოო. თურქეთს ასევე არ მოუხდენია განსაკუთრებული რეაგირება ჰუმანიტარული ტვირთის დაბომბვაზე. ისე არ გამოვიდეს, რომ ამ დიდმა ქვეყნებმა ერთმანეთში მოილაპარაკონ და ჩვენ ხახამშრალი დავრჩეთ", - განაცხადა არეშიძემ.
წყარო: გაზეთი „პრაიმტაიმი"
