შვეიცარიაში კორუფციაში ეჭვმიტანილი ფიფა-ს ჩინოვნიკები დააკავეს. როგორც „ნიუ-იორკ თაიმსი" იტყობინება, ბრალდება შესაძლოა, 10-ზე მეტ ჩინოვნიკს წაუყენონ. ესენია სამხრეთ ამერიკის ფეხბურთის კონფედერაციისა (CONMEBOL) და ჩრდილოეთ და ცენტრალური ამერიკისა და კარიბის ზღვის აუზის ქვეყნების ფეხბურთის კონფედერაციის ჩინოვნიკები, რომლებსაც ფულის გათეთრებასა და თაღლითობაში ადანაშაულებენ.
დაკავებების სერია ციურიხში ჩატარდა, სადაც ფიფა-ს აღმსასრულებელი კომიტეტის სხდომა მიმდინარეობს. დაკავებულთა ვინაობა ჯერ უცნობია, თუმცა როგორც „ნიუ-იორკ თაიმსი" წერს, დაკავებულთა შორის არ არის ფიფა-ს ყოფილი პრეზიდენტი ზეპ ბლატერი.
ციურიხის პოლიციის ცნობით, დაკავების ოპერაცია ქვეყნის იუსტიციის სამინისტროსა და პოლიციის განკარგულებით ჩატარდა.
23 ნოემბერს ფიფა-ს ეთიკის კომიტეტის საარბიტრაჟო პალატამ ზეპ ბლატერისა და უეფა-ს პრეზიდენტ მიშელ პლატინის წინააღმდეგ გამოძიება დაიწყო. ბლატერს პლატინისთვის ჰონორარის სახით 2 მილიონი შვეიცარიული ფრანკის გადახდაში ადანაშაულებენ.
ფიფა-ს რამდენიმე მაღალჩინოსანი კორუფციის ბრალდებით ციურიხში მაისშიც დააკავეს, კიდევ რამდენიმეს ბრალდება წაუყენეს.
