ვიცე-პრემიერი/ენერგეტიკის მინისტრი კახა კალაძე და კომპანია „ჯორჯიან უოთერ ენდ ფაუერის" გენერალური დირექტორი გიორგი ცხადაძე მცხეთის მუნიციპალიტეტის სოფელ საგურამოში, „საგურამოს" ჰიდროელექტროსადგურის მშენებლობის ოფიციალური გახსნის ცერემონიალს დაესწრნენ.
„საგურამოს" ჰიდროელექტროსადგურის დადგმული სიმძლავრე 4,4 მგვტ იქნება, წლიური გამომუშავება კი 32 მლნ.კვტსთ. „საგურამოჰესის" ექსპლუატაციაში გაშვება 2016 წლის ბოლოსათვის იგეგმება და მასში კომპანია „ჯორჯიან უოთერ ენდ ფაუერი" 10,5 მლნ ლარის ინვესტიციას განახორციელებს.
კომპანიას უკვე მიღებული აქვს გარემოზე ზემოქმედების შეფასების (გზშ) ნებართვა და დაწყებულია მშენებლობისათვის მოსამზადებელი სამუშაოები - სამანქანო დარბაზის მშენებლობა და სადაწნეო და გამყვანი მილსადენების მონტაჟი.
ჰიდროელექტროსადგურისათვის ტურბინას, გენერატორს და დამხმარე მოწყობილობებს ავსტრიული კომპანია ANDRITZ HYDRO SAS დამზადებს.
ჰესი მთელი წლის განმავლობაში თანაბარი სიმძლავრით იმუშავებს, რაც საშუალებას მოგვცემს შევამციროთ ზამთრის დეფიციტი.
მომავალში შესაძლებელია ჰესში გატარებული სუფთა წყლის გადამუშავება და თბილისის წყალმომარაგებისთვის გამოყენება.
„მისასალმებელია ის, რომ ბოლო წლების განმავლობაში ძალიან გააქტიურდა ადგილობრივი ბიზნესი ენერგეტიკის სექტორში პროექტების განხორციელების მიმართულებით. ჩვენ გავამარტივეთ გარკვეული რეგულაციები, შევამსუბუქეთ, უფრო მარტივი გავხადეთ ინვესტიციების განხორციელება და დღეს, რა თქმა უნდა, საამაყოა ის, რომ გარდა უცხოელი ინვესტორებისა , რომელთაც ძალიან დიდი ინტერესები აქვთ ამ დარგში ინვესტიციების განხორციელების მიმართულებით, აქტიურად არიან ჩართულები ქართველი ბიზნესმენებიც. საგურამო თითოეული ჩვენი თანამემამულისთვის ასოცირდება დიდ ილია ჭავჭავაძესთან, რომელიც ჩვენი ქვეყნის პროგრესზე და განვითარებაზე ზრუნავდა.
ახალი ტექნოლოგიური აღჭურვით, ეკოლოგიურად უნაკლო ჰესის აქ აშენება არის ერთგვარი დასტური იმ დიდი იდეებისა და სწრაფვებისა, რაზეც ბოლო ორი საუკუნეა ჩვენი ქვეყნის პროგრესულად მოაზროვნე საზოგადო მოღვაწეები ოცნებობდნენ. მე მინდა, ძალიან დიდი მადლობა გადავუხადო ყველა იმ ადამიანს, ვინც პირველივე დღიდან ჩართული იყო ამ პროექტში და მადლობა მინდა გადავუხადო იმ ადამიანებს, ვინც მონაწილეობას მიიღებს ამ პროექტის განხორციელებაში. არ არსებობს ქვეყნის წინაშე დიდი და პატარა დამსახურებები. ყველაფერი, თუნდაც რამდენიმე ადამიანის საკეთილდღეიდ გაკეთებული, არის შემადგენელი ერთი საერთო დიდი საქმის. ჩვენ ვაშენებთ წარმატებულ ქვეყანას, წარმატებულ საქართველოს!", - განაცხადა კახა კალაძემ .
