15 დეკემბერს, 20:00 საათზე, თბილისის დიდ საკონცერტო დარბაზში ირაკლი ჩარკვიანის ხსოვნისადმი მიძღვნილი საღამო გაიმართება. პირველად ქართულ რეალობაში კონცერტისთვის სპეციალურად დამზადდება ირაკლი ჩარკვიანის 3D გამოსახულება (ჰოლოგრამა), რომლის საშუალებითაც მოხდება ერთ-ერთი ჰიტის თავად ირაკლის მიერ შესრულება.

ღონისძიების ორგანიზატორებს მადლობას უხდის მუსიკოსის მეუღლე ქეთათო ჩარკვიანი:

„ამაღელვებელია ჰოლოგრამა, რომელიც პირველად კეთდება საქართველოში. ვღელავ და ველოდები ირაკლის „გაცოცხლებას" სცენაზე. მადლობა მინდა გადავუხადო ორგანიზატორებს. ფონდ „ავტოგრაფს" და ყველა იმ ადამიანს, ვინც ამ კონცერტისთვის დაიხარჯა. ეს იქნება შეჯამება ირაკლის მუსიკის, მისი თანამედროვე ხედვა და მისი ახალი სიცოცხლე. ირაკლი ჩარკვიანი ჩვენთან დაბრუნდება", - განაცხადა ქეთათომ.

კონცერტზე ბევრი სხვადასხვა ჯგუფი და შემსულებელი შეასრულებს ირაკლი ჩარკვიანის სიმღერებს. მუსიკოსის მამა გელა ჩარკვიანი კი მესამე სიუიტას შეასრულებს.

„ძალიან მახარებს ეს ამბავი. ირაკლი შვილია ჩემი, ადრე წასული ამქვეყნიდან და მისი ყოველი „გაცოცხლება" რა თქმა უნდა, დიდ ემოციას იწვევს ჩემში. ამ კონცერტზე მესამე სიუიტას შევასრულებ. თუ შევძელი და კარგად დავუკარი, იმედი მაქვს დამიფასებს მაყურებელი...", - განაცხადა გელა ჩარკვიანმა.

წყარო: გაზეთი „პრაიმტაიმი"

(მოამზადა ალა გრიგალაშვილმა)