იუსტიციის მინისტრ თეა წულუკიანის განცხადებით, საქართველოს კონსტიტუციას ეწინააღმდეგება, რომ პატრიარქს შეწყალების უფლება ჰქონდეს.
მისი თქმით, პატრიარქისთვის აღნიშნული უფლების მინიჭებით კონსტიტუციურ პრობლემებს წავაწყდებით და დავარღვევთ იმ პრინციპს, რასაც სახელმწიფოს და ეკლესიის გაყოფა ჰქვია.
„ასეც რომ არ იყოს, მე არ ვისურვებდი, რომ ჩვენი ეკლესიის სულიერ ხელმძღვანელს ჰქონდეს შეწყალების უფლება, რადგან ამ შემთხვევაში ასევე გიწევს შეწყალებაზე უარის თქმაც. ეს ძალიან დიდ ნეგატივს მიმართავდა პატრიარქისადმი, რასაც მე მას ნამდვილად არ ვუსურვებ. ჩვენ - საერო ხელისუფლება ვართ აქ იმისთვის, რომ მივიღოთ ნეგატივი, როდესაც მოქალაქეს ვეუბნებით უარს.
თუკი პატრიარქს აქვს განცდა, რომ უფრო მეტი პატიმარი იმსახურებს შეწყალებას, ამისთვის საკმარისია, პრეზიდენტმა უფრო მეტად გაითვალისწინოს სასულიერო პირების, მათ შორის პატრიარქის რეკომენდაციები. ამით ეს პრობლემა ამოიწურება", - განაცხადა თეა წულუკიანმა.
