საქართველოს ბიზნესასოციაციის პრეზიდენტმა გიორგი ჭირაქაძემ ჟურნალისტებს განუცხადა, რომ ხელისუფლებასა და ბიზნესს შორის მეტი პირდაპირი კომუნიკაცია უნდა არსებობდეს.
„მთავარია ის, რომ უნდა არსებობდეს პირდაპირი კომუნიკაცია ხელისუფლებასა და ბიზნესს შორის. ყველა პრობლემაზე, რომელიც ბიზნესმენებს აწუხებთ, რეაგირება მყისიერად უნდა ხდებოდეს", - განაცხადა ჭირაქაძემ.
მისივე თქმით, იქიდან გამომდინარე, რომ შემდეგი წელი პოლიტიკურად აქტიური და საარჩევნო წელია, მნიშვნელოვანია, რომ ამ ორ მხარეს შორის მეტი კომუნიკაცია არსებობდეს.
„ჩვენ, ბიზნესი იმედიანად ვართ განწყობილები. ჩვენ ვმუშაობთ ხელისუფლების ყველა შტოსთან, როგორც კი რაიმე პრობლემა ან სერიოზული პრეტენზიები იქნება, ამაზე აუცილებლად მომენტალურად განვაცხადებთ, მაგრამ მე მაინც იმედიანად ვარ განწყობილი, რომ ჩვენი პოლიტიკური სპექტრი, ხელისუფლება გააცნობიერებს იმას, რომ ბიზნესთან აქტიურად მუშაობა ძალიან მნიშვნელოვანია და ჩვენ შევძლებთ, შემდეგი წელიც შევინარჩუნოთ სტაბილურ წლად.
იმედი არ მაქვს, რომ მომავალ წელს დიდი ეკონომიკური ზრდა იქნება. ეს არ არის მარტო საქართველოზე დამოკიდებული. თქვენ ხედავთ, რაც ხდება რეგიონში. მაგრამ ამის მიუხედავად, მჯერა, რომ ოპოზიცია და ხელისუფლება ერთობლივი მუშაობით გააკეთებენ იმას, რომ ეკონომიკა გაიზარდოს და წინ წავიდეს", - განაცხადა გიორგი ჭირაქაძემ.
