იტალიაში, რომის ლიტერატურის სახლში, საქართველოს საელჩოს ორგანიზებით, მწერალ დავით ტურაშვილის საღამო და მისი რომანის „ჯინსების თაობის" იტალიური თარგმანის პრეზენტაცია გაიმართა.
ღონისძიებამ, რომელსაც დაახლოებით 70 სტუმარი ესწრებოდა, საინტერესოდ ჩაიარა. საღამო გახსნა და დამსწრე საზოგადოებას სიტყვით მიმართა საქართველოს ელჩმა იტალიაში კახა სიხარულიძემ, რომელმაც 1983 წელს თბილისში დატრიალებულ ტრაგედიაზე და საბჭოთა იმპერიის რეალურ სახეზე ისაუბრა. ელჩის შემდეგ წიგნის მნიშვნელობასა და მის ლიტერატურულ ღირებულებებზე ისაუბრეს გამომცემელმა ფრანჩესკო პალომბიმ და იტალიელმა პოლიტიკოსმა, იტალიის ღირებულებების ფონდის დირექტორმა და საქართველოს დიდმა მეგობარმა უმბერტო კროპიმ. დამსწრე საზოგადოებას სიტყვით მიმართა საქართველოს ელჩმა ვატიკანში ქეთევან ბაგრატიონ-მუხრანბატონმა. რის შემდეგაც, უკვე თავად ავტორი, დათო ტურაშვილი ესაუბრა სტუმრებს, რომლებმაც დიდი ინტერესი გამოხატეს წიგნის მიმართ და უპასუხა მათ შეკითხვებს.
წიგნის პრეზენტაციის შემდეგ, ლიტერატურის სახლის ფორთოხლის ბაღში გაიმართა მიღება, სადაც სტუმრებს საშუალება მიეცათ დაეგემოვნებინათ ქართული ღვინო და კერძები.
