სოფლის მეურნეობის მინისტრმა ოთარ დანელიამ მთის განვითარების ეროვნული საბჭოს სხდომის დასრულების შემდეგ განაცხადა, რომ ძალიან მნიშვნელოვანია იმ მთიანი რეგიონების ხელშეწყობა, სადაც ეკონომიკური აქტივობა განსაკუთრებულად დაბალია.
„მოგეხსენებათ, ჩვენ რამდენიმე კვირის წინ გამოვიტანეთ 12 მუნიციპალიტეტი, რომელიც გვინდოდა, რომ გამონაკლისის სახით დამატებით კიდევ წაგვეხალისებინა სოფლის მეურნეობის პროექტების განვითარების კუთხით. შესაბამისად, ეს უკვე გლობალურად აგვარებს ამ პრობლემას. ძალიან მნიშვნელოვანია იმ მთიანი რეგიონების ხელშეწყობა, სადაც ეკონომიკური აქტივობა განსაკუთრებულად დაბალია. ამ შემთხვევაში, ერთი მხრივ, ეს კარგად ახალისებს ბიზნესსექტორს, რომ გრძელვადიანი ინვესტიციები აწარმოონ ამ რეგიონებში და რაც ყველაზე მნიშვნელოვანია, არის ძალიან კარგი ვადა 10 წელი, რათა კარგად დაგეგმონ თავიანთი ბიზნესი. ამ კუთხით ეს არის ძალიან კარგი მოტივატორი", - განაცხადა დანელიამ.
რაც შეეხება უშუალოდ სოფლის მეურნეობის კუთხით წახალისებას, მინისტრის თქმით, მნიშვნელოვანია გადამმუშავებელი წარმოება.
„მოგეხსენებათ, რომ ჩვენ განსაკუთრებით ვახალისებთ გადამუშავებას და შესაბამისად, პირველადი წარმოებიდან გვინდა, რომ მაქსიმალურად გავზარდოთ დამატებული ღირებულება სოფლის მეურნეობაში, რომელიც უკვე საკმაოდ კარგ მაჩვენებლებს გვიჩვენებს და საბოლოო ჯამში, ეს მნიშვნელოვანია იმ კუთხით მაღალმთიან რეგიონში, როგორიცაა სასაწყობე, შემნახვევლი და გადამმუშვებელი მეურნეობები, რისი დეფიციტიც დღეს არის ქვეყანაში. სწორედ ამიტომ არის პრეცედენტები, როდესაც ქართული პროდუქცია შეიძლება გადიდოდეს ქვეყნიდან და ის კვლავ უკან ბრუნდებოდეს შენახვის გარკვეული ვადის შედეგად. ამიტომ ეს მნიშვნელოვნად დააბალანსებს ამ მოცემულობას", - განაცხადა ოთარ დანელიამ.
