შინაგან საქმეთა სამინისტროს იურიდიული დეპარტამენტის ხელმძღვანელი ზვიად ოქროპირიძე მართვის მოწმობაზე ქულების დაკლების შესახებ „ქართული არხის" ეთერში დეტალურად საუბრობს:

„ყველა საგზაო მოძრაობის წესების დარღვევას ექნება თავისი შესაბამისი საჯარიმო ქულა. არასწორ გასწრებაზე დაახლოებით საუბარია 10-15 ქულის ჩამოკლებაზე. თავდაპირველად, როდესაც კანონპროექტი მომზადდა, ქულათა რაოდენობა შედარებით გაბერილი იყო, მაგრამ ეს კანონპროექტი განიხილეს მთავრობის სხდომაზე და მათი შენიშვნების შემდეგ არსებითად შემცირდა თითო დარღვევაზე ქულების რაოდენობა. როდესაც მძღოლი ქვეითთა გადასასვლელ გზაზე ქვეითს გზას არ დაუთმობს, დაჯარიმდება 40 ლარით და ჩამოაკლდება 5 ქულა. განმეორების შემთხვევაში მძღოლს ჩამოაკლდება 10 ქულა. თუ წესების დარღვევას მოჰყვება საავარიო ვითარება, ქულათა რაოდენობა რა თქმა უნდა, აიწევს და იქნება 20 ქულა. თუკი გზის დათმობის წესის დარღვევა გამოიწვევს შეჯახებას, საჯარიმო იქნება 30 ქულა", - განაცხადა ოქროპირიძემ.