უფლებადამცველი დიმიტრი ლორთქიფანიძე საკრებულოს დამოუკიდებელი დეპუტატის ალექსანდრე ელისაშვილის განცხადებას აფასებს. როგორც ლორთქიფანიძე აღნიშნავს, ელისაშვილის განცხადებები სერიოზულ ბრალდებებს უკავშირდება, ამის არ დამტკიცების შემთხვევაში კი, პროკურატურას სხვა სახის გამოძიების ჩატარება მოუწევს.
„პატრიარქის პოზიცია, რომ მას მონაწილეობა მიეღო შეწყალების პროცესებში, ელისაშვილისთვის პირობით რეფლექსად იქცა. როგორც თავად ელისაშვილი ამბობს, მისი სკანდალური განცხადების საფუძველი, პატრიარქის პოზიციის მიმართ პოლიტიკოსთა მიერ გამოთქმული მოსაზრებები გახდა. პროკურატურისთვის შეტყობინების ოქმი არ შემდგარა და მტკიცების ტვირთი დღეს ვისზეა?! მძიმე ან განსაკუთრებით მძიმე დანაშაულის შეუტყობინებლობისთვის, კანონში სანქციაა გათვალისწინებული. ასე უაპელაციო ბრალდებები როგორ შეიძლება?! საქმე აღარ გვაქვს პიროვნული დისკრედიტაციისა და საქმიანი რეპუტაციის შელახვასთან. ეს არის სერიოზული ბრალდება, რომლის ვერდამტკიცების შემთხვევაში, პროკურატურა ვალდებულია, საქმის წარმოება ყველა იმ გარემოების გათვალისწინებით დაიწყოს, რამაც ელისაშვილი და მის უკან მდგომი პირები აიძულა, ამ მოქმედებებზე წასულიყვნენ." - განაცხადა დიმიტრი ლორთქიფანიძემ გადაცემაში „2030."
