ორგანიზაციის „ყოფილი პოლიტპატიმრები ადამიანის უფლებებისთვის" თავმჯდომარე ნანა კაკაბაძე პოლიტპატიმართა სიაში ნარკოტიკებით ვაჭრობაზე გასამართლებული პირების არსებობას გამორიცხავს. ამის შესახებ კაკაბაძემ გადაცემაში „2030" განაცხადა.
ნანა კაკაბაძის თქმით, პოლიტპატიმართა სიებისა და შეწყალების კომისიის გარშემო ატეხილი აჟიოტაჟი უბრალოდ პიარის ნაწილია, რომელიც დაინტერესებული პირებით იმართება.
„ჩვენ დიდი ხანია მიგვაჩვიეს იმას, რომ ქვეყანა პიარით იმართება. ადამიანის დასადანაშაულებლად არგუმენტები და მტკიცებულებები საჭირო არ არის. კანონში უნდა შესულიყო დამატება, რომ პოლიტპატიმრობა ახლადაღმოჩენილ გარემოებად ჩათვლილიყო, რათა ამ ადამიანებს სასამართლოსთვის მიემართათ და საზოგადოებას ენახა, რა მტკიცებულებები დევს მათ საქმეებში. როცა არავითარი მტკიცებულება არ არის, ეს ადამიანები ციხეში რატომ სხედან, თუ არა პოლიტიკური ნიშნით?! სრული პასუხისმგებლობით ვაცხადებ, რომ პოლიტპატიმართა სიაში არცერთი ნარკოტიკით მოვაჭრე პირი არ ყოფილა." - განაცხადა ნანა კაკაბაძემ.
