„ახალგაზრდული ცენტრის" ხელმძღვანელი ზურაბ ქადაგიძე ალეკო ელისაშვილის განცხადებებთან დაკავშირებით „რეპორტიორს" ესაუბრება:
„კვლავ გამართლდა ჩვენი პროგნოზი, საქმე ეხება ალეკო ელისაშვილის განცხადებებს და მის პოლიტიკურ თამაშს. როგორც განვითარებული მოვლენები გვიჩვენებს, საქმე გვაქვს წმინდა პოპულისტურ, პოლიტიკურ განცხადებებთან, რომელსაც არავითარი საერთო არ აქვს რეალობასთან, მისი ყოველი ქმედება და განცხადება ემსახურებოდა ქულების დაწერას გარკვეული პოლიტიკური პარტიის წინაშე.
პიროვნულად მის მიმართ არანაირი პრეტენზია და შეუთავსებლობა არ გვაქვს, უბრალოდ, ჩვენდა სამწუხაროდ, ის აღმოჩნდა პოლიტიკურად უმწიფარი და ადვილად მოექცა გარკვეული ზემოქმედების ქვეშ, რომელთაც ალეკო ელისაშვილზე მანიპულირება ადვილად შეძლეს.
დღეს უკვე თამამად შეიძლება ითქვას, რომ ფუჭი აღმოჩნდა მისი სიტყვები, რომელიც შეეხებოდა მუქარის შემცველი სმს-ების არსებობას მის ტელეფონში. ასევე ე.წ. კოკაინის საქმეზე გასამართლებული ზაუტაშვილის პერიფრაზირებას მოვახდენთ, რომელიც ამბობს, „ზღაპარია ის ინფორმაცია, რაც ალეკო ელისაშვილმა და ქორიძემ გამოძიებას მიაწოდეს".
დიახ, მეგობრებო, ზღაპარი, სახელწოდებით „ელისაშვილი - გმირი", დასასრულს უახლოვდება და ის მისი მთავარი შემოქმედისთვის კრახით სრულდება", - აცხადებს ქადაგიძე.
