„ვიზალიბერალიზაცია! ბოლო დროს ასე არაფერი გამხარებია, რა მაგარია, აბა ჰე საქართველო!"- ასე ეხმაურება თაკო ჩარკვიანი ევროკომისიის დასკვნას ვიზალიბერალიზაციასთან დაკავშირებით.

დღეს ევროკომისიის დასკვნა გამოქვეყნდა, სადაც აღნიშნულია, რომ ევროპის მინისტრების საქართველოს მოქალაქეების უვიზო მიმოსვლას ევროპის ქვეყნებში  მხარს უჭერენ.

უვიზო მიმოსვლის შემდეგ საქართველოს მოქალაქეები შენგენის ზონაში მყოფ 22 ქვეყანაში შეძლებენ უვიზოდ მოგზაურობას, ეს ქვეყნებია: ავსტრია, ბელგია, გერმანია, დანია, ესპანეთი, იტალია, ესტონეთი, ლიტვა, ლატვია, ლუქსემბურგი, მალტა, ნიდერლანდები, პოლონეთი, პორტუგალია, საბერძნეთი, საფრანგეთი, სლოვენია, სლოვაკეთი, უნგრეთი, ფინეთი, შვედეთი და ჩეხეთი.

ასევე შენგენის ზონაში მყოფი ამ 22 ქვეყნის გარდა, შესაძლებელი იქნება უვიზოდ მოგზაურობა შენგენის კანდიდატ ქვეყნებშიც. ასეთი ოთხი ქვეყანაა - ბულგარეთი, კვიპროსი, რუმინეთი და ხორვატია.

უვიზო მიმოსვლა შესაძლებელი იქნება ევროკავშირის არაწევრ ქვეყნებშიც - ისლანდია, ლიხტენშტეინი, ნორვეგია, შვეიცარია. აქაც აუცილებელი იქნება ბიომეტრიული პასპორტი.

მოგზაურობა ამ კონკრეტულ ქვეყნებში შესაძლებელია 90 დღის განმავლობაში. საქართველოს მოქალაქეებს შეეძლებათ ეს 90 დღე გადაანაწილონ და გამოიყენონ ის 180 დღის განმავლობაში, ან ერთიანად. ანუ, უვიზო მიმოსვლა გულისხმობს შემდეგ ფორმულას- 6 თვის განმავლობაში შენგენის ზონაში შეგიძლიათ იყოთ მხოლოდ 90 დღე.

მოგზაურობისათვის საჭიროა ბიომეტრიული პასპორტი, რომელსაც ვადის ამოწურვამდე მინიმუმ 6 თვე ექნება დარჩენილი. ამასთან მესაზღვრემ შესაძლოა მოითხოვოს დამატებითი დოკუმენტები, მაგალითად, უკან დასაბრუნებელი ბილეთი, სასტუმროს ჯავშანი, მოწვევა, ან თუ სამკურნალოდ მიდიხართ, კონკრეტული საავადმყოფოს დამადასტურებელი დოკუმენტი. 

თუკი საქართველოს ბიომეტრიული პასპორტი აქვს ოკუპირებულ ტერიტორიაზე მცხოვრებ მოქალაქეს, ეს ცვლილება მათაც ავტომატურად ეხება.

ხაზგასასმელია ის ფაქტი, რომ უვიზო მიმოსვლა არ გულისხმობს დასაქმებისთვის გზის გახსნას.

გადაწყვეტილების ძალაში შესვლამდე კიდევ ორი ინსტანციაა გასავლელი.