ჟურნალისტი და პუბლიცისტი გიორგი უძილაური სოციალურ ქსელში ევროკომისიის გუშინდელი დასკვნის შემდეგ კომენტარს აკეთებს:
„მეამაყება საქართველოს მოქალაქეობა. იმიტომ, რომ საქართველო ჩემი სახლია. ყველა ქვეყნის ნახვა მინდა, ევროკავშირთან უვიზო რეჟიმი ძალიან მიხარია, თუმცა არსად არ გადავსახლდები, იმიტომ, რომ საქართველო ჩემი სახლია. ბევრი ქვეყანა საქართველოზე უფრო ძლიერი და მდიდარია, თუმცა, სხვის დალაგებულთან მიჩოჩებას ჩემი არეულის დალაგებაში მონაწილეობა მირჩევნია... იმიტომ, რომ ჩემი სახლია", - წერს უძილაური.
ევროკომისიამ ვიზა-ლიბერალიზაციასთან დაკავშირებით საქართველოს შესახებ ანგარიში გამოაქვეყნა. ანგარიში ევროპული კომისიის ოფიციალურ ვებ-გვერდზე გუშინ დაიდო. დოკუმენტი საქართველოს შესახებ დადებით შეფასებებს შეიცავს. კონკრეტულად, მასში ნათქვამია, რომ საქართველომ ვიზა-ლიბერალიზაციის სამოქმედო გეგმით ნაკისრი ყველა ვალდებულება შეასრულა.
ევროკომისიას მიაჩნია, რომ სავიზო ლიბერალიზაციის გეგმის ოთხივე ნაწილში საქართველოს მიერ განხორციელებული პროცედურები შეესაბამება ევროპულ და საერთაშორისო სტანდარტებს.
ეს არის საქართველოს შესახებ ევროკომისიის ბოლო, რიგით მეოთხე ანგარიში საქართველოს მიერ ვიზა-ლიბერალიზაციის სამოქმედო გეგმის შესრულებასთან დაკავშირებით.
