საქართველოს პრემიერ-მინისტრმა ირაკლი ღარიბაშვილმა თანამდებობა დატოვა. განცხადება ღარიბაშვილმა მთავრობის კანცელარიაში რამდენიმე წუთის წინ გააკეთა:
„მას შემდეგ რაც ბატონმა ბიძინა ივანიშვილმა გადადგა უპრეცედენტო ნაბიჯი და მისი პოპულარობისა და გავლენის ზენიტში მყოფმა, მისივე გადაწყვეტილებით დატოვა თანამდებობა, მან შექმნა მაგალითი, როგორ უნდა აკეთოს პოლიტიკოსმა ქვეყნისთვის სასარგებლო საქმე, როგორც დროული მოსვლით, ისე დროული წასვლით თანამდებობიდან.
გულწრფელად გეტყვით, ჩემთვის თანამდებობა - იქნებოდა ეს შს მინისტრობა თუ პრემიერ-მინისტრობა, ზოგადად ხელისუფლებაში ყოფნა არასდროს ყოფილა ჩემი თვითმიზანი! ჩემთვის ეს არის საშუალება, რომ ვემსახურო ქვეყანას და ჩემს ხალხს. ეს არის ჩემი პოლიტიკური მრწამსი! პოლიტიკური კულტურის დამკვიდრება დაიწყო სწორედ ჩვენმა გუნდმა.
დიდი მნიშვნელობა აქვს, თუ რა მაგალითს დავუტოვებთ ჩვენს შვილებს, რა მაგალითს მივცემთ მომავალ თაობას. თანამდებობები არის დროებითი. მარადიული არის უფალი და სამშობლო! მივიღე გადაწყვეტილება, დავტოვო პრემიერ-მინისტრის პოსტი. მინდა, ვუსურვო წარმატება ჩვენს მომავალ პრემიერ-მინისტრს", - განაცხადა ირაკლი ღარიბაშვილმა.
