შეხლა-შემოხლა ბათუმში - ცენტრალური ბულვარის ახალი კონცეფციის განხილვა სიტყვიერ და ფიზიკურ დაპირისპირებაში გადაიზარდა. დაპირისპირება მას შემდეგ დაიწყო, რაც მოქალაქე ჯემალ ქიქავამ ბულვარში დაგეგმილი ცვლილებები დანაშაულებრივ გარიგებად შეაფასა. მოქალაქის თქმით, ბულვარის ახალი კონცეფცია ნიშნავს მის გაყიდვას.
აღნიშნულს უმაღლესი საბჭოს „ქართული ოცნების" დეპუტატის დავით ბაციკაძისგან რეპლიკა მოჰყვა. დაპირისპირება შეხლა-შემოხლაში გადაიზარდა.
ჯემალ ქიქავას განცხადებით, „ბენდუქიძემ გაყიდა საქართველოს ქონება, მაგრამ ბულვარს არ შეეხო. ასლან აბაშიძე არ ეხებოდა ბულვარს, სააკაშვილმა გაზარდა ბულვარი. ესენი კი ბომჟები მოვიდნენ უფულოდ, ხაბაძეს მიჰყიდეს ქონება ერთ ლარად, დღეს ორ მილიონად იყიდება"...
„ქართული ოცნების" დეპუტატის დავით ბაციკაძის განმარტებით, ახლა პოლიტიკოსია და როცა თმენის ვალდებულება არ ექნება, ჯემალ ქიქავას ამ საკითხზე დაელაპარაკება.
ბულვარის განვითარების კონცეფციის განხილვა, რომელიც დღეს უკვე ტარდებოდა, სამ საათზე მეტხანს გაგრძელდა. დარბაზი საზოგადოების დიდმა ნაწილმა პროტესტის ნიშნად დატოვა, რადგან შეხვედრა კითხვა-პასუხის რეჟიმში არ მიმდინარეობდა.
მოამზადა სალომე ჯანდიერმა
