საქართველოს პრეზიდენტმა ქვეყნის ყველაზე მაღალი ჯილდო - ეროვნული გმირის წოდება მარიამ (მარო) მაყაშვილს მიანიჭა. მარო მაყაშვილის შთამომავალს - ელიზბარ ერისთავს გადაეცა ეროვნული გმირის ორდენი. განცხადება პრეზიდენტმა ოქროყანაში, რამდენიმე წუთის წინ გააკეთა.

„მარო მაყაშვილი იყო პატარა გოგო, რომელიც წინა საუკუნის 20-იან წლებში დაიღუპა. გოგო, რომელსაც ჰქონდა ძალიან ნათელი იმედები, ფიქრობდა ოჯახზე, ფიქრობდა, როგორ წავიდოდა ევროპაში, ფიქრობდა საზოგადოებაში თავის როლზე. მაგრამ, აღმოჩნდა ერთი ყველაზე მნიშვნელოვანი ღირებულება - საქართველოს, მისი ქვეყნის თავისუფლება. მარო მაყაშვილი, რომელიც დაიღუპა 19 წლის, იმ ახალგაზრდა იუნკერებთან ერთად, რომლებიც იბრძოდნენ ჩვენი ქვეყნის დამოუკიდებლობისთვის, რომლებიც იბრძოდნენ იმისთვის, რომ საქართველო ყოფილიყო თავისუფალი, გახდება პირველი ქალბატონი, რომელსაც მიენიჭება ეროვნული გმირის წოდება. მინდა, მადლობა გითხრათ ყველას, ვინც აქ ბრძანდებით და იზიარებთ ამ ემოციას. მთავარი ღირებულებები არის უზენაესი და შესაძლოა, შევწიროთ ჩვენი სიცოცხლე. მინდა, მადლობა ვუთხრა მარო მაყაშვილის შთამომავლებს. საქართველოს დამოუკიდებლობისთვის ბრძოლაში გამოჩენილი გმირობისა და აღმატებული ღვაწლისთვის, წითელი ჯვრის მოწყალების დას მარიამ მაყაშვილს მიენიჭოს ეროვნული გმირის წოდება და გადაეცეს ეროვნული გმირის ორდენი, გარდაცვალების შემდეგ!" - განაცხადა პრეზიდენტმა.