თბილისის მერმა დავით ნარმანიამ კომენტირებისას განაცხადა, რომ თუ დასუფთავების სამსახურის თანამშრომლები ჩვეულ სამუშაო რეჟიმში ვერ ჩადგებიან, ისინი ახალი თანამშრომლებით ჩანაცვლდებიან.
„მერიამ წინასაახალწლოდ დასუფთავების თანამშრომლები დამატებით წაახალისა, ისევე როგორც გასულ წელს. გარდა ამისა, ჩვენ, სამსახურის თანამშრომლებს ახალი წელი მივულოცეთ და ისინი შესაბამისად დავაფასეთ. თუმცა, არის რამდენიმე ადამიანი, რომელსაც დისციპლინური გადაცდომის გამო, შედარებით ნაკლები ჩაერიცხათ. ეს სწორედ მოქმედი კანონდებლობიდან და წესებიდან გამომდინარეობს, ამიტომ პრეტენზია ამ თვალსაზრისით ვერ იქნება მიღებული. სამსახური ჩვეულ რეჟიმში აგრძელებს მუშაობას, ისინი ჩანაცვლდნენ სხვა ადამიანებით, რომლებიც ჩვენ გვყავს რეზერვში. ვფიქრობ, იმედია ჩვეულებრივ სამუშაო რეჟიმში ჩადგებიან, სხვა შემთხვევაში უბრალოდ შესაძლოა მეტი პრობლემა მივიღოთ. ქალაქში ნამდვილად არ გვინდა პრობლემა. ამიტომ თუ ისინი ჩვეულებრივ სამუშაო რეჟიმში ვერ ჩადგებიან, ქალაქს ვერ დავტოვებთ დაუსუფთავებელს და შესაბამისად, ისინი ახალი თანამშრომებით ჩანაცვლდებიან", - განაცხადა დავით ნარმანიამ.
თბილისის მერის განცხადებით, დასუფთავების სამსახურის გაფიცულ თანამშრომლებს, აქვთ მოლაპარაკებები თავიანთ ხელმძღვანელობასთან, შესაბამისად, შეჯერდებიან, რომ მუშაობა ჩვეულ რეჟიმში გაგრძელდეს.
მოამზადა ნათია ცუხიშვილმა
